ئەکسیۆس: ئەمریکا ڕێگەدەدات ئێران یۆرانیۆم بپیتێنێت

ئاڤا نیوز

ئەمریکا لە پێشنیازەکەی ڕۆژی شەممەدا کە ناردی بۆ تاران، ڕەزامەندی نیشانداوە ئەو وڵاتە بە ڕێژەیەکی دیاریکراو یۆرانیۆم بەدەستبهێنێت.

چیرۆکی سەرەکی: ترەمپ و بەرپرسانی باڵای ئەمریکا جەخت لەوەدەکەنەوە کە ڕێگە نادەن ئێران یۆرانیۆم بپیتێنێت، بەڵام لە پێشنیازەکەیاندا بۆ تاران نەرمییان نواندووە.

لێدوانی فەرمی: دوو سەرچاوەی ئاگادار لە بابەتەکە بە ئەکسیۆسی ئەمریکییان ڕاگەیاندووە، پێشنیازی نوێی ئەمریکا ڕێگە بە ئێران دەدات بۆ ماوەیەکی دیاریکراو بە ڕێژەیەکی کەم یۆرانیۆم بپیتێنێت.

لەلایەکی دیکەوە: ئێران بەردەوام دەڵێت، هیچ ڕێککەوتنێک واژۆ ناکات کە پیتاندنی یۆرانیۆم بۆ مەبەستی مەدەنیانە قەدەغە بکات و بە هێڵێکی سوور ناوی دەبەن کە ئەمەش لەگەڵ هەڵوێستی ئەمریکادا ناگونجێت.

ئەوەی پێویستە بیزانیت: بەم مەرجانە ڕێککەوتنی ئەمریکا و ئێران دادەڕێژرێت:

- ڕێگە نادرێت ئێران تواناکانی پیتاندنی یۆرانیۆمی زیاتر بێت لەو ئاستەی پێویستە بۆ مەبەستی مەدەنیانە.

- دوای ڕێککەوتنی ئەمریکا و ئێران لەسەر پێشنیازەکە، تاران دەبێت بەشێوەیەکی کاتی پیتاندنی یۆرانیۆم بۆ 3% کەمبکاتەوە.

- دامەزراوەکانی پیتاندنی یۆرانیۆم لەژێر زەمینەکانی ئێراندا بۆ ماوەیەک کە لەسەر ڕێککەوتن دەکرێت دەبێت ناکارا بکرێن.

- چالاکیی پیتاندنی یۆرانیۆم لە دامەزراوەکانی ئێران بەشێوەیەکی کاتی لە ئاستی پێویست بۆ دابینکردنی سووتەمەنی بۆ ڕیاکتۆرە ئەتۆمییەکان بە پێی ڕێنماییەکانی ئاژانسی نێودەوڵەتی وزەی ئەتۆم سنووردار دەکرێت.