ئەردۆغان: هیوای من ئەوەیە پووتین و ترەمپ و زێلێنسکی لە ئیستەنبووڵ کۆبکەمەوە

ئاڤا نیوز

 

سەرۆککۆماری تورکیا پێشنیاز دەکات کۆبوونەوەی لووتکەی نێوان هەر یەکە لە سەرۆکی ئەمریکا، ڕووسیا و ئۆکراینا لە تورکیا بەڕێوەبچێت.

 

وێنە گەورەکە: ڕۆژی دووشەممە، 2 – 6 – 2025،  دووەم گەڕی دانوستاندنە ڕاستەوخۆکانی نێوان ڕووسیا و ئۆکراینا لە ئیستەنبووڵ بەڕێوەچوو، بەڕێوەچوونی دانوستاندنەکان لەکاتێکدایە کە ڕۆژێک پێش کۆبوونەوەکە ئۆکراینا، گەورەترین هێرشی ئاسمانی کردە سەر فڕۆکەخانە سەربازییەکانی ڕووسیا، بەپێی ڕاپۆرتی دەزگای هەواڵگریی ئۆکراینا بەهۆی تێکشکاندنی مووشەک هەڵگر و فڕۆکە سەربازیەکان 7 ملیار دۆلار زەرەر و زیان بەر رووسیا کەوتووە.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند، "گەورەترین هیوای من ئەوەیە، سەرکەوتووبم لە کۆکردنەوەی ڤلادیمێر پووتین و ڤۆلۆدیمێر زێلێنسکی لە ئیستەنبووڵ یان ئەنقەرە، ئەویش بە ئامادەبوونی دۆناڵد ترەمپ، سەرۆکی ئەمریکا، ئەگەر ڕێکبکەون، منیش لەگەڵیان دەبم بۆ ئەوەی ئیستەنبووڵ ببێتە ناوەندیی ئاشتی.

 

ئەوەی لەبارەیەوە دەگوترێت: کارۆلین لێڤێت، وتەبێژی کۆشکی سپی، ڕایگەیاند، دۆناڵد ترەمپ ئامادەیە بەشداریی ئەو کۆبوونەوەیە بکات، بەڵام بەو مەرجەی هەردوو سه‌رۆكه‌كه‌ بۆ گفتوگۆ و سازش ئامادە بن.