لە سووریا و یەمەنەوە هێرش کرایە سەر ئیسرائیل؛ تەلئەڤیڤیش پەیامێکی تووند دەداتە ئەحمەد شەرع

ئاڤا نیوز

بە سێ مووشەک لە یەمەن و سووریاوە ناوچەکانی ئیسرائیل بۆردوومانکران و سوپای ئیسرائیلیش دەڵێت، هێشتا نازانن چ گرووپێک لە سووریاوە بۆردوومانیان کردوون، بەڵام ئیسرائیل پەیامێکی تووندی دایە ئەحمەد شەرع و بەرپرسیارێتی هێرشەکانی خستە ئەستۆی ئەو.

وێنە گەورەکە: ئێوارەی ئەمڕۆ لە باشووری سووریاوە دوو مووشەک لە سووریاوە ئاراستەی ناوچەکانی ئیسرائیل لە بەرزاییەکانی جۆلان کران و تائێستا هیچ گرووپێک بەرپرسیارێتی هێرشەکەی لە ئەستۆ نەگرتووە.

ڕاگەیێنراوی فەرمی: میدیاکانی ئیسرائیل بڵاویانکردەوە، دوو موشەکەکەی سووریا لە ناوچەی دەرعا لە باشووری ئەو وڵاتەوە بەرەو ئیسرائیل ئاراستە کراون و هیچ زیانێکیان نەبووە.

لێدوانی فەرمی: کەمێک پێش ئێستا ئیسرائیل کاتز، وەزیری بەرگریی ئیسرائیل ڕایگەیاند: "ئەحمەد شەرع، سەرۆککۆماری سووریا بەرپرسە لە هەر هێرشێک کە لە خاکی سووریاوە بکرێتە سەر ئیسرائیل".

وەزیری بەرگریی ئیسرائیل ڕاشیگەیاند، "هەر هێرشێکمان بکرێتە سەر لە زووترین کاتدا وەڵاممان دەبێت"

لەلایەکی دیکەوە: سوپای ئیسرائیل ڕایگەیاند، لە وەڵامی دەستدرێژی سووریادا هێرشی سەربازییان بۆسەر ئەو وڵاتە دەستپێکردووە.

هاوکات، سوپای ئیسرائیل مووشەکێکی حووسییەکانیان خستە خوارەوە کە لە یەمەنەوە ئاراستەی ئیسرائیل کرابوو.