کۆمەڵی دادگەری پێنجەمین کۆنگرەی خۆی دەبەستێت

ئاڤا نیوز

بڕیارە دوای پشووی جەژنی قوربان، کۆمەڵی دادگەری کوردستان، کۆنگرەی پێنجەمی خۆی لە هەولێر ببەستێت، چاوەڕوان دەکرێت جارێکی دیکە عەلی باپیر بە سەرۆکی حیزبەکە هەڵبژێردرێتەوە.

وێنە گەورەکە: کۆمەڵی دادگەری دوای چوار ساڵ کۆنگرە دەکات، عەلی باپیر لە سێ خول ئەمیر و لە خولی چوارەم سەرۆکی حیزبەکە بووە، لە کۆنگرەی پێنجەم چاوەڕوان دەکرێت گۆڕانکاری لە پەیڕەوی حیزب بکرێت و ژمارەی ئەندامانی ئەنجوومەنی باڵا زیادبکرێت.

لێدوانی فەرمی: بێستوون حەمە ساڵح، بەرپرسی مەکتەبی هەڵبژاردنی کۆمەڵی دادگەری بە ئاڤای گوت، "شوێنەکەمان دیاریکردووە و بۆماوەی دوو ڕۆژ کۆنگرەی پێنجەمی حیزب، بە بەشداری 850 ئەندام لە هەولێر بەڕێوەدەچێت، ڕەنگە گۆڕانکاری لە شێواز و جۆری ئەرکەکەی سەرۆکی کۆمەڵی دادگەری بکرێت."

زانیاریی زیاتر: لە کۆنگرەی پێنجەم ئەندامانی ئەنجوومەنی سەرکردایەتی هەڵدەبژێردرێن کە 29 کەسن، دوای کۆنگرە ئەوان حەوت بۆ نۆ ئەندامی ئەنجوومەنی باڵا دیاری دەکەن.

ئەوەی پێویستە بیزانیت: لە پەیڕەوەی کۆمەڵی دادگەری هیچ مەرجێک دانەنراوە، بۆئەوەی خۆکاندیدکردنەوەی سەرۆکی حیزبەکە سنووردار بکات، بەمەش بە ئەگەری زۆرەوە بۆ خولی پێنجەم لەسەر یەک، عەلی باپیر؛ بە سەرۆکی کۆمەڵی دادگەری هەڵدەبژێردرێتەوە.

باکگراوند: کۆمەڵی دادگەریی کوردستان مانگی پێنجی ساڵی 2001 دامەزراوە و تاوەکو ئەمڕۆ چوار کۆنگرەی بەستووە. لە هەڵبژاردنی خولی شەشەمی پەرلەمانی کوردستان، سێ کورسی بەدەستهێنا، دوو لە ئەندامەکانیان سوێندی یاساییان نەخواردووە و بایکۆتیان کرد.