چەند پەیامێک لە سەرۆکی دادگای فیدراڵییەوە بۆ کوردستان: دەستوور بنەمای دابەشکردنی داهاتە

ئاڤا نیوز

سەرۆکی دادگای باڵای فیدراڵیی عێراق لە چەند پەیامێکی جیاوازدا بۆ سێ سەرۆکایەتییەکەی عێراق و هەرێمی کوردستان جەخت لە پێویستی کارکردن بەگوێرەی دەستوور دەکاتەوە.

چیرۆکی سەرەکی: جاسم محەممەد عەبوود، سەرۆکی دادگای باڵای فیدراڵیی عێراق بەبۆنەی هاتنی جەژنی قوربان چەند پەیامێک ئاراستەی سەرۆکایەتییەکانی عێراق و هەرێمی کوردستان دەکات.

پەیامی فەرمی: جاسم محەممەد عەبوود، پەیامێکی ئاراستەی سەرۆکوەزیران مەسرور بارزانی کردووە، وێڕای پیرۆزبایی، سەرۆکی دادگای باڵای فیدراڵیی عێراق جەخت لەسەر پێویستی کارکردن بەپێی دەستوور دەکاتەوە و ئاماژە بۆ ئەوە دەکات بە کارکردن بە دەستوور بەرژەوەندی گەلی عێراق بە تەواوی بەرجەستە دەبێت.

ئاماژە بۆ ئەوەش دەکات، دەستوور زامنی یەکێتی و بەدیهێنانی بنەمای یەکسانییە لە دابەشکردنی دادپەروەرانەی سامانەکاندا.

لەلایەکی دیکەوە: سەرۆکی دادگای باڵای فیدراڵی پەیامێکی هاوشێوەی بۆ نێچیرڤان بارزانی، سەرۆکی هەرێمی کوردستان ناردووە و تێیدا  ئاماژە بە کارکردن بەپێی دەستوور دەکات بۆ ئەوەی ببێتە ڕێکخەری ژیانی سیاسی، ئابووری، کۆمەڵایەتی و ڕۆشنبیری و گەرەنتیکەری مافی هەموو ڕۆڵەکانی گەلی عێراق و ئازادییەکانیان، ئەمەش "بانگهێشتمان دەکات هەموومان کار بکەین لە پێناو ئەم گەلەدا بەپێی ئەو بەها مرۆییانەی دەستوور لەخۆی گرتوون".