نەتەوە یەکگرتووەکان: ئیسرائیل بە ئەنقەست خەڵکی غەززە برسی دەکات

ئاڤا نیوز

نەتەوە یەکگرتووەکان ڕەخنە لە سیاسەتەکانی ئیسرائیل بۆ برسیکردنی خەڵکی غەززە دەگرێت و دەڵێت ئیسرائیل بە ئەنقەست ئەو سیاسەتانەی گرتوونەتە بەر.

وێنە گەورەکە: بەهۆی شەڕ و ئاڵۆزییەکان لە کەرتی غەززە، سەرەڕای هەوڵی چەند وڵات و ڕێکخراوێک بۆ گەیاندنی هاوکاری ، ئیسرائیل گەمارۆی خستووەتە سەر دانیشتوانی ئەو کەرتە و بە زەحمەت خواردن و خواردنەوەیان دەست دەکەوێت.

لێدوانی فەرمی: تۆم فلێچەر، سەرۆکی ئاژانسی یارمەتیی نەتەوە یەکگرتووەکان ڕایگەیاند دیمەنە ترسناکەکانی ئەم دواییەی خەڵکی غەززە کە لەکاتی هەوڵدانیان بۆ وەرگرتنی یارمەتیی خۆراکی کوژران، ئەنجامی ئەو "بژاردە بە ئەنقەستانەیە" کە ئیسرائیل بۆ بێبەشکردنی خەڵکی غەززە لە پێداویستییە بنەڕەتییەکانی ژیان گرتوویەتیە بەر.

زانیاریی زیاتر: بە گوتەی فڵێچەر، "جیهان ڕۆژ لەدوای ڕۆژ سەیری دیمەنە ترسناکەکانی تەقەکردن لە فەلەستینییەکان و بریندارکردن و کوشتنیان لە غەزە دەکات، لە کاتێکدا تەنیا هەوڵی بەدەستهێنانی خواردن دەدەن. ئەمە ئەنجامی زنجیرەیەک بڕیاری بەئەنقەستە کە بە شێوەیەکی سیستەماتیکی دوو ملیۆن کەسیان لە پێداویستییە سەرەکییەکان بێبەش کردووە کە بۆ زیندوو مانەوە پێویستن."

ئەم لێدوانە دوای ئەوە دێت کە سەربازانی ئیسرائیل تەقەیان لەو فەلەستینییانەی کەرتی غەززە کرد کە لە سەرەی وەرگرتنی یارمەتیی خۆراکدا وەستا بوون و لانیکەم 27 کەسیان لێ کوشتن و دەیانی دیکەشیان بریندار کردن.