ئیلۆن مەسک ڕەخنە لە ترەمپی هاوڕێی دەگرێت: مایەپووچ کردنی ئەمریکا قبووڵ ناکرێت

ئاڤا نیوز

 

ئیلۆن مەسک، ملیاردێری جیهان، ڕەخنە لە پرۆژە یاساییەکی ترەمپی هاوڕێی دەگرێت- کە سەرۆکی ئەمریکا ڕەوانەی کۆنگرێسی کردووە- مەسک لەوبارەیەوە دەڵێت، "پێویستە ئەو پڕۆژە یاسایە بوەستێنن".

 

چی ڕوودەدات: مەسک زۆر بە توندی ڕەخنەی لەو پرۆژە  یاسایەی دۆناڵد ترەمپ گرت کە بەهۆی ئەو پڕۆژەیەوە ئاستی قەرزەکانی ئەمریکا بەرزبووەتەوە، بەبێ ئەوەی خەرجی کەم بکرێتەوە، هۆشداریش دەدات، ئەو ڕێکارانەی دۆناڵد ترەمپ کورتهێنان زیاد دەکات و قەرزی نیشتمانیش خێرا بەرز دەکاتەوە. مەسک داوای لە هاووڵاتییانی ئەمریکا کرد، فشار لە دادگا و دادوەران بکەن، کە پرۆژە یاساکەی دۆناڵد ترەمپ بۆ خەرجی و باج ڕەتبکەنەوە.

 

لێدوانی فەرمی: ئیلۆن مەسک لە ئێکس نووسیوویەتی، "پەیوەندی بە ئەندامانی کۆنگرێس و ئەنجوومەنی پیرانەوە کردووە کە مایەپووچ کردنی ئەمریکا  قبووڵ ناکرێت و پێویستە ئەو پرۆژە یاسایە بووەستێنن، کە ترەمپ پێشنیازی کردووە.''
 
باکگراوند: ئیلۆن مەسک بەڕێوەبەری جێبەجێکاری کۆمپانیاکانی تێسلا و سپەیس ئێکس دوای چوار مانگ کارکردنی وەک بەپرسی فەرمانگەی کارامەیی حکومەتی ئەمریکا کە ئامانج لێی کەمکردنەوەی خەرجییەکانی حکومەت و دووبارە داڕشتنەوەی پێکهاتەی حکومەتی فیدراڵی بوو، لەم چەند ڕۆژی ڕابردوودا ماڵئاوایی لە پۆستە ئیدارییەکەی کرد.