برایەکی ئۆجەلان بۆ ئاڤا: ئەم جەژنە لای ئۆجەلان دەکەین

ئاڤا نیوز

محەممەد ئۆجەلان، برای ڕێبەری زیندانیکراوی پەکەکە دەڵێت، "ئەم جەژنە خانەوادەکەمان سەردانی ئۆجەلان دەکات و بۆ یەکەمجاریشە ڕێگە بە سەردانیکردنی منداڵ دەدرێت بچنە ئیمرالی و ئۆجەلان ببینن".

 

چیرۆکی سەرەکی: دوای بەرەوپێش چوونی هەنگاوەکانی پرۆسەی ئاشتی لە تورکیا، سەردانەکان بۆ لای عەبدوڵڵا ئۆجەلان ڕێبەری زیندانیکراوی پەکەکە ئاسانتر بووە، دوای ژمارەیەک سەردانی شاندی دەمپارتی، بڕیارە خانەوادەکەی لە دووەم ڕۆژی جەژن سەردانی ئۆجەلان بکەن.

 

لێدوانی فەرمی: محەممەد ئۆجەلان، برای عەبدوڵڵا ئۆجەلان، ڕێبەری زیندانیکراوی پەکەکە بە ئاڤا میدیای ڕاگەیاند: "دووەم ڕۆژی جەژن خانەوادەکەمان سەردانی ئۆجەلان دەکات، ئەمجارە جگە لە خانەوادەکەمان منداڵەکانی کوڕی فاتیمەی خوشکم لەگەڵمان دەبن، بۆ یەکەمجارە دوای دەستگیرکردنی، ڕێگا دەدرێت ئۆجەلان منداڵ ببینێت".

 
زانیاریی زیاتر: محەممەد ئۆجەلان دەشڵێت، جاری پێشوو کاتژمێر و نیوێک لای ماینەوە، ئەمجارە کاتەکەی زۆرترە و ژمارەمان زیاترە.

 

لەلایەکی دیکە: بەبۆنەی جەژنی ڕەمەزان، ئێوارەی دووشەممە 31/3/2025، عومەر ئۆجەلان، برازای عەبدوڵڵا ئۆجەلان، لەگەڵ چەند کەسێکی دیکەی خانەوادەکەی سەردانی ئیمرالیان کردبوو.

 

ئەمەش بزانە: ڕۆژی 15/2/1999، عەبدوڵڵا ئۆجەلان، ڕێبەری پەکەکە لە وڵاتی کینیا دەستگیر کرا.

 

ئەوەی پێویستە بیزانیت: ڕۆژی دووشەممە 2025.5.12، لەسەر بانگەوازی عەبدوڵڵا ئۆجەلان، ڕێبەری زیندانیکراوی پەکەکە، ئەو ڕێکخراوە دەرئەنجامی کۆتا کۆنگرەی خۆی ئاشکراکرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداریی دەهێنن.