20 هەزار فۆڕمی دیکەی پێدانی زەوی وردبینییان بۆ دەکرێت

ئاڤا نیوز

 

بیست هەزار فۆڕمی دیکەی پێدانی زەوی وردبینییان بۆ دەکرێت، 20ـی ئەم مانگەش دوا وادەیە بۆ وەرگرتنی فۆڕم و تەواوكردنی كەموكوڕییەكان و هێنانی بەڵگەنامە پێویستەكان.

 

وێنە گەورەکە: دوای ئەوەی  ئەنجوومەنی وەزیرانی هەرێمی كوردستان بە نووسراوی ژمارە 242 لە 27ـی ئاداری 2024، بڕیاریدا بە پێدانی زەوی بە فەرمانبەران و خانەنشینانی هەرێمی كوردستان، تائێستا بە پێنج قۆناغ، 422 هەزار کەس وردبینی فۆڕمەکانیان تەواو کراوە و ڕەزامەندی پێدانی زەوییان بۆ دەرچووە، لە قۆناغی شەشەمی پرۆسەکەش وردبینی بۆ بیست هەزار فۆڕمی دیکە دەکرێت.

 

لێدوانی فەرمی: مەروان عەبدولەتیف، سەرۆکی لێژنەی باڵای وردبینی فۆڕمەکانی دابەشکردنی زەوی بە ئاڤای گوت: بیست هەزار فۆڕمی وەزارەتی پێشمەرگە و خانەنشینانمان لەبەردەستە و وردبینییان بۆ دەکەین، دوای تەواو کردنیشیان ڕاستەوخۆ ڕەوانەی ئەنجوومەنی وەزیران دەکرێن بۆ وەرگرتنی ڕەزامەندی پێدانی زەوی.

 

ئەوەی پیویستە بیزانیت: هەر فەرمانبەرێک هەشت ساڵ خزمەتی هەبێت یان هەر خانەنشینێک لەژیاندابێت و پێشتر سوودمەند نەبووبێت، پێدانی زەوی دەیگرێتەوە.