بەغدا وەک پایتەختی ڕۆشنبیریی وڵاتانی ئیسلامی بۆ ساڵی 2026 هەڵبژێردرا

ئاڤا نیوز

وەزیری ڕۆشنبیری و گەشتوگوزار و شوێنەواری عێراق ڕایدەگەیێنێت، شاری بەغدا وەک پایتەختی ڕۆشنبیریی وڵاتانی ئیسلامی بۆ ساڵی 2026 هەڵبژێردراوە. هەروەها ئاماژەی بەوەشکرد کە ژمارەی گەشتیارانی بیانی بۆ عێراق بەردەوام لە زیادبووندایە.

بۆچی گرنگە: هەڵبژاردنی بەغدا وەک پایتەختی ڕۆشنبیریی جیهانی ئیسلامی گرنگییەکی ستراتیژی و هەمەلایەنەی هەیە. تەنیا دانپێدانانێک نییە بە مێژووی قووڵی ڕۆشنبیری و شارستانی بەغدا، بەڵکو وێنەی شارەکە لەسەر ئاستی نێودەوڵەتی باشتر پیشان دەدات و هاندان و پاڵپشتییەکە بۆ کەرتی گەشتوگوزار و ئابووری.

لێدوانی فەرمی: ئەحمەد فەکاک بەدرانی، وەزیری ڕۆشنبیری و گەشتوگوزار و شوێنەواری عێراق بە ئاژانسی هەواڵی عێراقی ڕاگەیاند: بڕیارەکە لە ڕێکخراوی عەرەبی بۆ پەروەردە و ڕۆشنبیری و زانست کە بارەگاکەی لە مەغریبە، دەرچووە. ڕوونیشیکردەوە کە ئەم ڕێکخراوە تایبەتە بە جیهانی ئیسلامی و بڕیاری داوە بەغدا وەک پایتەختی ڕۆشنبیریی وڵاتانی ئیسلامی هەڵبژێردرێت.

لە هەمان کاتدا: وەزیری ڕۆشنبیری ڕایگەیاند: ئامادەکاری زۆر هەیە و وەزارەتی ڕۆشنبیری بە هاوکاری لەگەڵ وەزارەتەکانی پەروەردە و خوێندنی باڵا و وەزارەتەکانی دیکە و بەیتی حیکمە، کاردەکەن بۆ ڕێکخستنی ئەم شایستەییە.

بەدرانی ئاماژەی بەوەشکرد، گەشتیارانی بیانی پۆل پۆل دێنە بەغدا و لە بەغداوە دەچنە ئوور، بابل، ئاشوور و حەزەر. هەموو ڕۆژێک ژمارەیەکی زۆر گەشتیاری بیانی دەگەنە بەغدا. "ئامارمان هەیە سەبارەت بە ژمارەی ئەو گەشتیارانەی سەردانی ناوچە شوێنەوارییەکان دەکەن، ئامارەکە بەردەوام لە بەرزبوونەوەدایە و لە کۆتایی ئەمساڵدا ڕایدەگەیەنین".