وەزارەتی بازرگانیی عێراق دەستی بەسەر بڕێکی زۆر گەنمی ڕەنگکراودا گرت

ئاڤا نیوز

 

تیمەکانی چاودێریی بازرگانیی عێراق بە هەماهەنگی لەگەڵ هێزە ئەمنییەکان، دەستیان بەسەر کارگەیەکی پاککردنەوەی دانەوێڵەدا گرتووە کە بڕێکی زۆر گەنمی نایاسایی تێدا کۆکراوەتەوە.

 

بڵاوکراوەی فەرمی: بەڕێوەبەرایەتیی چاودێریی بازرگانی و دارایی لە وەزارەتی بازرگانی عێراق، ڕایگەیاند: لەسەر بنەمای زانیاریی ورد و بە هەماهەنگی لەگەڵ هێزە ئەمنییەکان، توانراوە لە پارێزگای دیوانییە کارگەیەک بدۆزرێتەوە کە بڕێکی زۆر گەنمی ناوخۆیی ڕەنگکراو ڕەنگی ڕەشی تێدا بووە. ئەم جۆرە گەنمە مامەڵەکردن پێوەی لە بازاڕەکاندا قەدەغەیە و بە شێوەیەکی نایاسایی و لە دەرەوەی ڕێنماییەکان عەمبار کراوە بۆ ئەوەی بفرۆشرێتەوە.

 

لەلایەکی دیکەی: ڕیاز مەهدی مووسەوی، بەڕێوەبەری گشتیی فەرمانگەی چاودێری ڕایگەیاند: تەواوی ئەو بڕە گەنمەی دەستی بەسەردا گیراوە لەلایەن هێزە ئەمنییەکانەوە پارێزگارییان لێ دەکرێت، هاوکات ڕێکاری یاسایی توند بەرامبەر سەرپێچیکاران گیراوەتەبەر کە یارییان بە قووتی هاووڵاتییان کردووە.

 

- پلانێکی چاودێریی توندوتۆڵیان داناوە بۆ چاودێریکردنی بازاڕەکان و ڕێگری لە مامەڵەکردن بەو ماددە خۆراکیانەی کە تایبەتن بە سەبەتەی خۆراکی هاووڵاتییان، ئەمەش بە ئامانجی پاراستنی ئاسایشی خۆراک لە وڵاتدا و دڵنیابوونەوە لە گەیشتنی شایستەکان بە دەستی هاووڵاتییانی شایستە.