120 هەزار دۆنم زەویی كشتوكاڵی بۆ دابەشكردنی بەسەر فەرمانبەران دەكوژێندرێتەوە

ئاڤا نیوز

 

یەكێتیی جووتیارانی كوردستان ئاشكرای دەكات، لەپێناو تەرخانكردنی زەوی گونجاو بۆ دابەشكردنی بەسەر ئەو فەرمانبەرانەی كە لە وەرگرتنی زەوی سوودمەند دەبن، نزیكەی 120 هەزار دۆنم زەویی كشتوكاڵی دەكوژێندرێتەوە و دەكرێن بە زەویی شارەوانی.

 

وێنە گەورەكە: ئێستا ڕەزامەندی 420 هەزار فۆرمی پێدانی زەوی بە فەرمانبەران و خانەنشینان لە ئەنجوومەنی وەزیران گەڕاوەتەوە، ڕەزامەندی تەرخانكردنی زەوی بۆ سوودمەندبووان تەواوبووە و ئاڕاستەی شارەوانییە پەیوەندیدارەكانی پارێزگا و ئیدارە سەربەخۆكان كراون، بەڵام لە بەشێك لە شوێنەكان گرفتی نەبوونی زەویی گونجاو بۆ دابەشكردن هەیە، بەتایبەت لە سنووری پارێزگای هەولێر.

 

ئەوەی پێویستە بیزانیت: پێشتر ساسان عەونی، وەزیری شارەوانی و گەشتوگوزاری هەرێمی کوردستان لە لێدوانێکی بۆ دەزگاکانی ڕاگەیاندن ئاماژەی بەوەكرد، بەمەبەستی تەرخانکردنی زەوی بۆ سوودمەندبووان، پێویستە بەشێک لە زەوییە کشتوکاڵییەکانی دەورووبەری هەولێر و چەند شارێكی تر بکوژێنینەوە و ڕەگەزی زەوییەکان بکەینە زەویی شارەوانی، پاڵپشت بە یاسا کارپێکراوەکان و بەهەماهەنگی لەگەڵ وەزارەتی کشتوکاڵ و سەرچاوەکانی ئاو.

 

زانیاریی بەدەستهاتوو: یەكێتیی جووتیارانی كوردستان بە نووسراوی فەرمی كە ئاڕاستەی وەزارەتی شارەوانی كردووە و وێنەیەكی بۆ وەزارەتی كشتوكاڵ و سەرچاوەكانی ئاویش ڕەوانە كردووە، نیگەرانی لە كوژاندنەوەی زەوییە كشتوكاڵییەكان و گۆڕینی ڕەگەزیان بۆ زەویی شارەوانی دەربڕیوە.

 

ڕاگەیێنراوی فەرمی: بەپێی بڵاوكراوەیەكی یەکێتیی جووتیارانی کوردستان، لە سنووری هەولێر 80 هەزار دۆنم زەویی کشتوکاڵی، لە سنووری سلێمانی 17 هەزار دۆنم و لە پارێزگای دهۆکیش 8 هەزار دۆنم و لە ئیدارەی گەرمیان 10 هەزار دۆنم زەویی كشتوكاڵی، بۆ مەبەستی دابەشكردنی بەسەر فەرمانبەران دەكرێنە زەویی شارەوانی.