سەرۆک بارزانی: زاڵمانە قووتی خەڵكی كوردستان لەلایەن دەستەڵاتدارانی بەغداوە بڕدراوە

ئاڤا نیوز

سەرۆک بارزانی بەبۆنەی جەژنی قوربانەوە پەیامێکی بڵاوکردەوە و ڕایدەگەیێنێت: لەكاتێكدا بەرەو ئەو جەژنە پیرۆزە دەڕۆین، بە بڕیارێكی ناڕەوا و زاڵمانە قووت و مووچەی خەڵكی هەرێمی كوردستان لەلایەن دەستەڵاتدارانی بەغداوە بڕدراوە.

چیرۆکی سەرەکی: سەرۆک مەسعود بارزانی، بە بۆنەی هاتنەوەی جەژنی قوربانەوە پەیامێک بڵاودەکاتەوە، پیرۆزبایی ئاراستەی موسڵمانانی كوردستان، عێراق و جیهان دەكات، هەروەها پیرۆزبایی لە خانەوادەی سەربەرزی شەهیدان و پێشمەرگە قارەمانەكان و هاووڵاتیانی كوردستان دەکات.

پەیامی فەرمی: لە پەیامەکەی سەرۆک بارزانی دا هاتووە: لەكاتێكدا بەرەو ئەو جەژنە پیرۆزە دەڕۆین، بە بڕیارێكی ناڕەوا و زاڵمانە قووت و مووچەی خەڵكی هەرێمی كوردستان لەلایەن دەستەڵاتدارانی بەغداوە بڕدراوە. بڕینی مووچە و سیاسەتی برسیكردنی بە کۆمەڵی گەلی كوردستان هیچ جیاوازییەكی لەگەڵ ئەنفال و كیمیاباران و ئەو جینۆسایدە نییە كە ڕژێمی پێشوو لەدژی گەلی كوردستان ئەنجامی دا.

- ئیرادەی گەلی كوردستان لە هەموو ستەمكاری و تاوان و ئەنفالێك بەهێزتر و بەرزترە. با ئەوانەی دژایەتیی خەڵک و هەرێمی کوردستان دەکەن ئاوڕێك لە مێژوو بدەنەوە، گەلی كوردستان لە بەرامبەر هەموو گوشار و زەبروزەنگێكدا خۆڕاگر بوو، بە سەر نەیار و تاوانباراندا سەركەوت، هەر پەشیمانی بۆ زۆرداران مایەوە.

- لەم بۆنە پیرۆزەدا وێڕای ئەوەی سوپاسی خۆڕاگری و جوامێری و سەربەرزیی تاك بە تاكی گەلەكەمان دەكەم، لە خودای مەزن داواكارم خێر و ئاسوودەیی بۆ كوردستان و عێراق و ئاشتی و سەقامگیری بۆ ناوچەكەمان و هەموو جیهان بەدی بهێنێت.