کونسوڵخانەی تورکیا قوربانی جەژن دەگەیەنێتە نزیکە دوو هەزار خێزان

ئاڤا نیوز

 

کونسوڵخانەی تورکیا لە هەرێمی کوردستان ئەمساڵ قوربانی دەکات و گۆشتی قوربانی دەگەیەنێتە نزیکە دوو هەزار خێزانی هەولێر و دهۆک و مووسڵ. 

 

چیرۆکی سەرەکی: لەیەکەم ڕۆژی جەژنی قورباندا کونسوڵخانەی تورکیا لە هەولێر لە ڕێگەی مانگی سووری تورکی و مانگی سووری عێراق بە هاوکاری دەزگای خێرخوازی بارزانی ژمارەیەک ئاژەڵی کرد قوربانی و گۆشتەکەشی بەسەر زیاتر لە هەزار  و 850 خێزان دابەش دەکرێت.

 

لێدوانی فەرمی: ئه‌رمان تۆپچو، کونسوڵی گشتیی تورکیا لە هەرێمی کوردستان، لە کۆنگرەیەکی ڕۆژنامەوانیدا ڕایگەیاند: جەژن لە کولتووری هاوبەشمان بە مانای یارمەتیدان دێت، بۆیە لە ڕێگەی مانگی سووری تورکی یان ڕێکخراوە مەدەنییەکان چالاکی خێرخوازی دەکەین، بۆ ئەمڕۆش 9 تۆن گۆشت بەسەر خێزانە هەژارەکان دابەش دەکەین، جێگەی خۆشحاڵییە سەربڕخانەی هەولێر هەموو ستاندەرەکان و پێوەرەکانی تەندروستیی ڕەچاو دەکات. 

 

گۆشەیەکی دیکەی دیمەنەکە: کونسوڵی گشتیی تورکیا باسی لەوەشکرد: سوپاسی دەزگای خێرخوازی بارزانی دەکەین لەکاتی کارەساتی سەدە لە تورکیا بە خێراترین کات گەیشتە شوێنی کارەساتەکە و فریاگوزاری و یارمەتی مرۆیی پێشکەش کرد.

 

زانیاریی زیاتر: گۆشتی قوربانییەکەی کونسوڵخانەی تورکیا بەسەر خێزانە هەژارەکان دابەش دەکرێت بەم شێوەی خوارەوە:

هەولێر: زیاتر لە هەزار خێزان.

دهۆک: زیاتر لە 250 خێزان.

مووسڵ: زیاتر لە 600 خێزان.