ئۆکراینا جارێکی دیکە بنکە ئاسمانییەکانی ڕووسیا بەئامانج دەگرێت

ئاڤا نیوز

ئۆکراینا ڕایگەیاند، توانیویەتی بە شێوەیەکی "سەرکەوتوو" لە کاتی شەودا هێرش بکاتە سەر دوو بنکەی ئاسمانیی ڕووسیا.

بڵاوکراوەی فەرمی: بە گوێرەی ڕاگەیێنراوەکەی سوپای ئۆکراینا "شەوی 6ـی حوزەیران، هێرشێکی سەرکەوتوو ئەنجام درا بۆ بنکەی ئاسمانیی ئەنگڵز لە هەرێمی ساراتۆڤ، شوێنێکی کۆکردنەوەی فڕۆکەکانی دوژمن." 

زانیاریی زیاتر: یەکێک لە بنکە ئاسمانییەکانی ڕووسیا لە باشووری وڵات و ئەوی دیکەشیان لە هەرێمێکی نزیک مۆسکۆی پایتەخت بووە کە لە ڕێگەیانەوە فڕۆکەی بۆمبهاوێژی ڕووسیا بۆ بۆردومانکردنی ئۆکراینا بەکار براون.

- ئاماژە بەوەش دراوە "بنکەی ئاسمانیی دیاگیلیڤۆ لە هەرێمی ڕیازان، کە فڕۆکەکانی دابینکردنی سووتەمەنیی ئاسمانی و پاسەوانیی فڕۆکە جەنگییەکان لەوێ بوون و بۆ پشتگیری هێرشە مووشەکییەکان بۆ سەر خاکی ئوکرانیادا بەکاردەهاتن، ئەوەش پێکرا."

 

لەلایەکی دیکەوە: چەند ڕۆژ پێشتریش ئۆکراینا هێرشێکی درۆنی کردە سەر بنکەیەکی ئاسمانیی ڕووسیا و بە گوتەی ئۆکراینا زیاتر لە 40 فڕۆکەی جەنگیی ڕووسیای لەو هێرشەدا لەناو بردن.