ئیسرائیل کوژرانی ئەمینداری گشتیی بزووتنەوەی موجاهیدینی ڕاگەیاند

ئاڤا نیوز

سوپای ئیسرائیل کوژرانی ئەمینداری گشتیی "کەتیبەکانی موجاهیدین"، لە هێرشێکی ئاسمانیدا بۆ سەر غەززە ڕاگەیاند و بزووتنەوەکەش هەواڵەکە پشتڕاست دەکاتەوە.

 

وێنە گەورەکە: سوپای ئیسرائیل بەردەوامە لە بە ئامانجگرتنی بەرپرسە باڵاکانی گرووپە چەکدارییەکان لە فەلەستین و لوبنان، لە دوایین هێرشیشیدا، ئەمینداری گشتی بزووتنەوەی موجاهیدینی کردە ئامانج.

 

لێدوانی فەرمی: ئەڤیخای ئەدرەعی، وتەبێژی سوپای ئیسرائیل ڕایگەیاند، سوپا و دەزگای ئاسایشی گشتی (شاباک) ئۆپەراسیۆنێکی هاوبەشیان ئەنجامداوە و " ئەسعەد ئەبو شەریعە، فەرماندەی ڕێکخراوی کەتیبەکانی موجاهیدین"یان لەناوبردووە، کە لە 7ـی ئۆکتۆبەر سنووری ئیسرائیلی بەزاندبوو و بەشداری لە ڕفاندن و دەستبەسەرکردنی بارمتە ئیسرائیلییەکاندا کردبوو.

 

لەهەمان کاتدا: سوپا ڕایشیگەیاند کە هێرشێکی جیاواز لە غەززە هەر ئەمڕۆ بووەتە هۆی کوژرانی مەحمود کەحیل، یەکێکی دیکە لە فەرماندەکانی کەتیبەکانی موجاهیدین.

 

لەلایەکی دیکەوە: بزووتنەوەی موجاهیدین کوژرانی ئەسعەد عەتیە ئەبو شەریعە، دامەزرێنەر و ئەمینداری گشتی و فەرماندەی گشتیی باڵە سەربازییەکەی لەگەڵ ئەحمەدی برایدا کە ئەندامی ئەمینداریەتیی گشتیی بزووتنەوەکە و بەرپرسی گۆڕەپانی غەززە بوو، ڕاگەیاند.