بەرپرسانی ئەمریکا: هێرشی "تۆڵە"ـی ڕووسیا بۆ سەر ئۆکراینا کاریگەر و فراوان دەبێت

ئاڤا نیوز

 

چەند بەرپرسێکی ئەمریکی ئاشکرای دەکەن، ڕووسیا وەڵامی هێرشەکەی هەفتەی ڕابردووی ئۆکراینا بۆ سەر بنکە سەربازییەکانی دەداتەوە. دەڵێن، هێرشەکە کاریگەر و فراوان دەبێت.

 

وێنە گەورەکە: سەرەڕای بەردەوامبوونیی دانوستاندنەکانی ئاشتی نێوان ڕووسیا و ئۆکراینا، هەفتەی ڕابردوو ئۆکراینا گەورەترین هێرشی بۆ سەر یەکێک لە بنکە سەربازییەکانی مۆسکۆ ئەنجامدا. ئەم هێرشە مۆسکۆی زۆر توڕەکرد و هەموو سەرچاوە ئەمنییەکان ئاماژە بە وەڵامێکی قورسی ڕووسیا بۆ سەر ئۆکراینا دەکەن.

 

لێدوانی فەرمی: بەرپرسانی ئەمریکا بە ڕۆیتەرزیان ڕاگەیاندووە، ئەمریکا پێیوایە هەڕەشەکانی ڤلادیمێر پووتین، سەرۆکی ڕووسیا بۆ تۆڵەسەندنەوە لە ئۆکراینا و ئەو هێرشەی ئەنجامی داوە، هێشتا جێبەجێ نەکراوە، ئەم وەڵامدانەوەیە  پێدەچێت بەرفراوان و فرەلایەنە بێت.

 

سەرچاوەکە دەشڵێت، کاتی وەڵامدانەوەی ڕووسیا ڕوون نییە، بەڵام پێشبینی دەکرێت لە ماوەی چەند ڕۆژێکدا ڕووبدات، هاوکات هێرشەکە پێشبینی دەکرێت بە مووشەک و فڕۆکەی بێفڕۆکەوان ئەنجام بدرێت.

 

لەلایەکی دیکەوە: ڕووسیا ڕۆژی هەینی هێرشێكی بەرفراوانی کردە سەر کیێڤی پایتەختی ئۆکراینا، بەڵام ئەو دوو بەرپرسە ئەمریکییەی بۆ ڕۆیتەرز قسەیان کردووە، پێیانوایە هێشتا ئەمە وەڵامی ڕووسیا نییە.

 

زانیاریی زیاتر: لەمیانی پەیوەندییە تەلەفۆنییەکەی ترەمپ و پووتین کە هەفتەی ڕابردوو ئەنجامدرا، پووتین بە ترەمپی وتووە کە ناچارن وەڵامی هێرشەکەی ئۆکراینا بدەنەوە.