ئیلۆن ماسک و وەزیرێکی ئیدارەی ترەمپ لەیەکیان داوە

ئاڤا نیوز

ئیلۆن ماسک، ملیاردێری ئەمریکی بەشەڕ و ئاژاوە کۆشکی سپی بەجێهێشت و میدیاکانی ئەمریکا بڵاویانکردووەتەوە، ملیاردێرە ئەمریکییەکە لەگەڵ وەزیرێکی ئیدارەی ترەمپ شەڕی دەستەویەخەی کردووە.

چیرۆکی سەرەکی: ڕۆژنامەی واشنتن پۆستی ئەمریکی ئاشکرایکردووە، لەناوەڕاستی مانگی نیساندا دۆناڵد ترەمپ، سەرۆکی ئەمریکا لە نووسینگەکەی لە کۆشکی سپی لەگەڵ ئیلۆن ماسک و سکۆت بێسنت، وەزیری گەنجینەی ئەمریکا کۆبووەتەوە، لەسەر بڕیاردان لەسەر پۆستێکی دەزگای داهاتی ناوخۆی کە سەر بە گەنجینەی ئەمریکایە، دەمەقاڵێیان کردووە و گفتوگۆکەیان گەیشتووەتە ئەوەی لەبەردەم ترەمپ سوکایەتییان بە یەکتر کردووە.

زانیاریی زیاتر: لە ڕاپۆرتەکەدا هاتووە، وەزیری گەنجینەی ئەمریکا بە ماسکی وتووە کەسێکی ساختەکاری، چونکە یەک تریلیۆن دۆلاری لەو خەرجییانە ئاشکرا نەکردووە کە گەڕێندراونەتەوە بۆ حکومەتی ئەمریکا و ماسکیش بەوە تووڕەبووە بە توندی شانی کێشاوە بە سنگی وەزیری گەنجینەی ئەمریکا، لە بەرامبەردا وەزیری گەنجینە لە ماسکی داوە و لەو کاتەدا ئەو کەسانەی لەوێ بوون بەپەلە هاتوونەتە نێوانیان.

ئەوەی لەبارەیەوە دەگوترێت: میدیاکانی ئەمریکا دەڵێن، ئەم شەڕەی کە لە نووسینگەکەی ترەمپ ڕوویدا بووە هۆی ئەوەی ئیلۆن ماسک لە کۆتایی مانگی پێنج لە پۆستەکەی دووربخرێتەوە.