ترەمپ لە دژی خۆپیشاندەران جوولە بە هێزەکان دەکات

ئاڤا نیوز

دوای بەردەوامی خۆپشاندانەکانی ئەمریکا و دروسبوونی گرژی و ئاڵۆزی، سەرۆکی ئەمریکا فەرمانی جوولەپێکردنی هێزەکانی ئەمریکای بۆ ئەو شارانە دەرکرد کە خۆپیشاندانی تێدایە.

وێنە گەورەکە: سەدان سەربازی پاسەوانی نیشتمانی ئەمریکا ئەمڕۆ یەکشەممە بە فەرمانی دۆناڵد ترەمپ، سەرۆکی ئەمریکا چوونە شاری لۆس ئەنجلس، ئەمەش بۆئەوەی ڕێگری بکەن لە زیاتر تەشەسەندنی خۆپیشاندانەکانی ئەو شارە دژ بە ناردنەوەی زۆرەملێی کۆچبەران.

ڕاگەیێنراوی فەرمی: سوپای ئەمریکا ڕایگەیاندووە، 300 سەرباز لە لیوای 79ی پیادەیان ڕەوانەی سێ ناوچەی گەورەی شاری لۆس ئەنجلس کردووە و ئەرکیان سەلامەتی و پاراستنی موڵک و فەرمانبەرانی حکومەتە.

لەلایەکی دیکەوە: جوڵاندنی هێزی سەربازی بۆ شارەکە نیگەرانی بەرپرسانی ناوخۆی ویلایەتی کالیفۆرنیای لێکەوتووە و گاڤین نیوزۆم، پارێزگاری ویلایەتی کالیفۆرنیا ڕایگەیاند، ترەمپ دوو هەزار پاسەوانی نیشتمانی دەنێرێتە لۆس ئەنجلس، نەک بۆ دابینکردنی سەلامەتی بۆ شارەکە، بەڵکو بۆ دروستکردنی قەیرانە.