ڕووسیا لە هەرێمی دنیپرۆپێترۆڤسکی ‌ئۆپەراسیۆنەکانی فراوانتر دەکات

ئاڤا نیوز

 

پێشڕەوییەکانی هێزەکانی ڕووسیا بەردەوامن و بەتایبەت لە هەرێمی دنیپرۆپێترۆڤسکی ئۆکراینا. 

 

وێنە گەورەکە: سەرەڕای بەردەوامبوونی دانووستانەکانی ئاشتی نێوان ڕووسیا و ئۆکراینا بەمەبەستی ڕاگرتنی خوێن ڕژێییەکەی کە زیاتر لە سێ ساڵە بەردەوامە، هێرشەکانی هەردوولا بۆ سەر پێگەی یەکتری ڕووی لە زیادبوون کردووە، مۆسکۆ لە زۆربەی بەرەکاندا پێشڕەوی دەکات، چەندین جار داواکارییەکانی ئەمریکا و ئەوروپا و ئۆکراینای بۆ ئاگربەستێکی تەواو و بێمەرج ڕەتکردووتەوە.

 

زانیاریی بەدەستهاتوو: وەزارەتی بەرگریی ڕووسیا ئاشکرای دەکات، ''هێزەکانی ڕووسیا گەیشتووەتە سنووری ڕۆژئاوای کۆماری گەلی دۆنێتسک و بەردەوامن لە هێرش بۆنێو هەرێمی دنیپرۆپێترۆڤسک.''

 
لەلایەکی دیکەوە: بەرپرسانی ئۆکراینا دەڵێن، هێزەکانیان ئازایانە بەرگریی دەکەن و سەنگەرەکانیان چۆڵ ناکەن.

 

ئەوەی لەبارەیەوە دەگوترێت: دیمیتری مێدڤێدێڤ، سەرۆکی پێشووی ڕووسیا و جێگری ئێستای سەرۆکی ئەنجوومەنی ئاسایشی نیشتمانی ڕایگەیاند، پێشڕەوییە نوێیەکە هۆشدارییەکە بۆ کیێڤ.

 

باکگراوند: دنیپرۆپێترۆڤسک شوینێکی پیشەسازیی گرنگی ئۆکراینایە، لە شوباتی 2022ـەوە  کە جەنگی نێوان ڕووسیا و ئۆکراینا دەستیپێکردووە، ئەمە یەکەمین جارە ڕووسیا هێرشی فراوانی بۆ سەر ناوچەکە ئەنجام بدات.