لە ڕۆژانی جەژندا نزیکەی 90 هەزار گەشتیار سەردانی هەولێریان کردووە

ئاڤا نیوز

لە هەر چوار ڕۆژی جەژنی قوربان ژمارەیەکی زۆر گەشتیار سەردانی ناوچە گەشتیارییەکانی پارێزگای هەولێر و ناوچەکانی دیکەی هەرێمی کوردستانیان کردووە، پلانی ئەمنی پارێزگای هەولێریش بەسەرکەوتوویی جێبەجێکراوە.

وێنە گەورەکە: بەپێی ئامادەکاری و ئەو پلانانەی کە بۆ ڕۆژانی جەژنی قوربان لەلایەن لیژنەى ئەمنى پارێزگاوە دانرا بوو، پلانەکە لە سنووری پارێزگای هەولێر بەسەرکەوتوویی و بەبێ گرفت جێبەجێکرا. هاوکات ژمارەی ئەو گەشتیارانەی سەردانی ناوچە گەشتیارییەکانی پارێزگای هەولێریان کردووە نزیکەی 90 هەزار گەشتیار بووە.

ڕاگەیێنراوی فەرمی: نووسینگەی پارێزگای هەولێر، ڕایگەیاند، بۆ ڕۆژانی جەژنی قوربان، پلانی گەشتوگوزار، وەک چۆن داڕێژرابوو تەواوی بڕگەکانی وەکو خۆی و بە سەرکەوتوویی جێبەجێکران، لە ڕۆژانی جەژنیش ژمارەی ئەو گەشیارانەی سەردانی هەولێری پایتەختیان کردووە، بریتی بووە لە 89 هەزار و 301 گەشتیار.

- لەو ژمارەیەی کە سەردانی سنووری پارێزگای هەولێریان کردووە، 108 هەزار گەشتیار سەردانی پارك و باخچەكانیان كردوە، 30 هەزار گەشتیاریش سەردانی پاركی شەهید سامی عەبدولڕەحمانیان كردووە.

- بەپێی ئەو پلان و ئامادەکارییانەی کە لەلایەن بەڕێوەبەرایەتیی ئاسایشی هەولێر دانرابوون، سەرجەم هێزەکانی ئاسایش لە هەر چوار ڕۆژی جەژندا ئەرک دابوون.

- سەبارەت بە پلانی بەڕێوەبەرایەتیی پۆلیسى هەولێر، سەرجەم هێزەکان لە هەموو بەش و هۆبەکانی بەڕێوەبەرایەتیی پۆلیسى هەولێر لە هەر چوار ڕۆژی جەژنی قوربان ئەرکەکانی خۆیان بەسەرکەوتوویی جێبەجێکرد.

ئەوەی پێویستە بیزانیت: ئاماری تاوانەکان لە ڕۆژانی جەژن بەمشێوەیە بوو:

- 42  تاوان تۆمارکراوە.

- 41  تاوان ئاشکراکراوە.

- یەک تاوانیش لە ژێرلێکۆڵینەوە دایە.