شوان كەلاری: عێراق 58 ماددەی دەستووری تایبەت بە هەرێمی كوردستان جێبەجێ ناکات

ئاڤا نیوز

 

ئەندامێکی ئەنجوومەنی نوێنەران دەڵێت، لە دەستووری هەمیشەیی عێراق 58 ماددەی تایبەت بە مافەکانی کورد و هەرێمی کوردستان هەیە، بەڵام حکومەتی عێراق هیچ یەک لەو ماددانەی جێبەجێ نەکردووە.

 

وێنە گەورەکە: دەستوور دەسەڵاتە جیاوازەکانی وڵات ڕێکدەخات و مافی هەمووان وەک یەک دەستەبەر دەکات، بەڵام ئەوەی تێبینی کراوە لە عێراق کار بە دەستوور ناکرێت، بە تایبەت ئەو ماددانەی پەیوەستن بە مافەکانی کورد. دەستووری عێراق لە 144 ماددە پێکدێت.

 

لێدوانی فەرمی: شوان کەلاری، ئەندامی ئەنجوومەنی نوێنەرانی عێراق بە ئاڤا میدیای وت، یەکەم هەنگاو کە حکومەتی عێراق بۆ جێبەجێ نەکردنی دەستوور دەستی پێکرد، پێشێلکردنی ماددەی 140 بوو، دەبوو ئەو ماددەیە تا 31-12-2007 جێبەجێ بکرێت، بەڵام حکومەتی عێراق بە سیاسەت ئەمەی نەکرد.

شوان کەلاری لەبارەی پێشێلکارییەکانی دەستوور لەلایەن حکومەتی عێراق ئەمانەشی وت: لە دەستووردا 58 ماددەی تایبەت بە کورد و هەرێمی کوردستان هەیە، عێراق هیچی جێبەجێ نەکردووە.

-     لە ماددەی چوار بڕگەی (ب) دەڵێ پێویستە زمانی کوردی وەک دووەم زمانی فەرمی بناسرێت، بەڵام لە یەک دامەزراوەی عێراق کار بە زمانی کوردی ناکرێت تەنانەت لەسەر دراوی عێراقیش زمانی کوردی نییە.

-    دەبوو لە سوپای عێراق هاوسەنگی هەبێت، نەک ئەوەیان نەکردووە، بەڵکو ژمارەی ئەفسەرانی کوردیان لە سوپا تا ئاستێکی زۆر کەمکردوەتەوە.

-    ئەوەی دەسەڵاتی عێراق بەرامبەر هەرێمی کوردستان دەیکات، بە ڕێنمایی وڵاتانی دیکەیە.