جەمیل بایک: برایەتی گەلان لە ڕۆژئاوای کوردستان شکستی نەهێناوە

ئاڤا نیوز

جەمیل بایک، هاوسەرۆکی دەستەی بەڕێوەبەریی کەجەکە ڕایدەگەیەنێت، هێرشەکان بۆ سەر ڕۆژئاوا و باکوور و ڕۆژهەڵاتی سووریا بەشێکن لە جەنگێکی گشتگیر بۆ لەناوبردنی ئیرادەی سیاسیی کورد و کۆمەڵگەی دیموکراسیخواز و ڕەتیشی دەکاتەوە برایەتی گەلان شکستی هێنابێت. 

لێدوانی فەرمی: جەمیل بایک، هاوسەرۆکی دەستەی بەڕێوەبەریی کەجەکە بۆ میدیاکان دەڵێت: "جیهان لە ناو جەنگی سێیەمی جیهانە، ئەم جەنگە وەک جەنگی یەکەم و دووەم نییە کە بەرەی ڕوون و دیاریکراوی هەبێت، بەڵکو ململانێیەکی بەردەوامە بۆ دروستکردنی هاوسەنگییەکی نوێی سیاسی لە ناو سیستەمی سەرمایەداریدا."

بایک دەشڵێت: "ڕۆژهەڵاتی ناوەڕاست مەیدانی سەرەکیی ئەم جەنگەیە و کوردستان لەبەر پێگە جوگرافیەکەی کەوتووەتە چەقەکەیەوە، ئەمریکا و ئیسرائیل ڕاستەوخۆ ئێرانیان کردووەتە ئامانج و دەیانەوێت هێزە بریکارەکانی لە ناوچەکەدا نەهێڵن."

٠ ئەگەر ڕژێمی ئێران گۆڕانکاریی بنەڕەتی نەکات، ڕووخانی مسۆگەرە.

٠ تورکیا ئەگەر کێشەی کورد بە شێوەیەکی دیموکراتی چارەسەر نەکات، تووشی قەیرانی مان و نەمان دەبێت، چونکە نەیارانی تورکیا ئەم کێشەیە بۆ لاوازکردنی وڵاتەکە بەکاردەهێنن.

٠ مۆدێلی ڕۆژئاوای کوردستان تەنیا بۆ کورد نییە، بەڵکو جێگەی هەموو پێکهاتەکانی وەک عەرەب، سریانی، تورکمان و ئەرمەنی تێدا بووەتەوە.

لەلایەکی دیکەوە: جەمیل بایک، هاوسەرۆکی کەجەکە ڕەخنەی لە هێزە نێودەوڵەتییەکان گرت و وتی: "ئەوان لەبەر بەرژەوەندیی خۆیان لەگەڵ دەوڵەتانی ناوچەکە پشتیان لە کورد کردووە و لەکاتی هێرشی سوپای عەرەبی سووریا بۆ سەر ڕۆژئاوای کوردستان بێدەنگیان هەڵبژارد.

زانیاریی زیاتر: بەگوێرەی قسەکانی بایک، سیستەمی ڕۆژئاوا لەسەر بنەمای ئازادیی ژنان و دیموکراسیی گەلان بونیاد نراوە، بووەتە مەترسی بۆ سەر هێزە دەسەڵاتخوازەکان و هێرشکردنە سەر ئەم سیستەمە، هێرشە بۆ سەر  کۆمەڵگەی دیموکراسیخواز.

ئەوەی پێویستە بیزانیت: بایک دەڵێت: "ڕەتی دەکەینەوە سیستمی حوکمڕانی ڕۆژئاوا لەسەر بنەمای برایەتی گەلان شکستی هێنابێت و لە ماوەی 14 ساڵی ڕابردوودا، ڕۆژئاوا سەلماندی گەلان دەتوانن بە ئاشتی پێکەوە بژین، بینیمان گەلی کورد لە هەموو شوێنێک چۆن پاڵپشتی ڕۆژئاوایان کرد، بەمە دەری خست چەند یەکگرتوو و یەکڕیزە بۆ پاراستنی دەسکەوتەکانی.