سیروان تۆفیق: پێویستە هەرێمی كوردستان ببێتە سویسڕای ڕۆژهەڵاتی ناوەڕاست

ئاڤا نیوز

بەڕێوەبەری بەبازاڕکردن لە دەستەی گەشتوگوزار ئاشكرای دەكات، پلان وایە هەرێمی كوردستان لەڕووی گەشتیارییەوە ببێتە سویسڕای ڕۆژهەڵاتی ناوەڕاست.

 

وێنە گەورەكە: بڕیارە کاتژمێر 8ـی ئێوارەی ئەمڕۆ، لە هەولێر، بە ئامادەبوونی مەسرور بارزانی، سەرۆکوەزیرانی کوردستان و ژمارەیەکی زۆر دیپلۆماتکار و کەسانی بیانی، دامەزراوەی ڤیزت کوردستان تایبەت بە كەرتی گەشتیاری، خۆی ڕابگەیێنێت، دامەزراوەكە ئامانجی ئەوەیە تا 10 ساڵی تر، ژمارەی هاتنی گەشتیاران بۆ هەرێمی کوردستان بگەیێنێتە 20 ملیۆن گەشتیار كە ئێستا گەیشتووەتە 9 ملیۆن.

 

لێدوانی فەرمی: سیروان تۆفیق، بەڕێوەبەری بەبازاڕکردن لە دەستەی گەشتوگوزاری هەرێمی كوردستان، تایبەت بە ئاڤا ڕایگەیاند، ئامانجەكە ئەوەیە كە كەرتی تایبەت هاوكار و هەماهەنگیى كەرتی حكومی بێت بۆ پێشخستنی سێكتەری گەشتیاری، دامەزراوەی ڤیزت كوردستان، گەشتیاریی هەرێمی كوردستان دەخاتە سەر نەخشەی گەشتیاریی جیهان.

 

- ڕوونیشی كردەوە، پەرەپێدانی كەرتی گەشتاریی هەرێمی كوردستان ڕەنگە بەخواستی وڵاتانی ئیقلیمی نەبێت بەو پێیەی دەبێتە هۆی كەمبوونەوەی ئاستی گەشتیاران بۆ ئەو وڵاتانە، بەتایبەت كە ڕووبەڕووی جۆرێك ناسەقامگیریی سیاسی، سەربازی و ئابووری بوونەتەوە، بەڵام بەگوێرەی ئەو پلانەی داڕێژراوە؛ كوردستان دەكەینە دڵی گەشتیاریی ڕۆژهەڵاتی ناوەڕاست و تا دە ساڵی تر، ڕێژەی هاتنی گەشتیاران بگەیەنینە 20 ملیۆن گەشتیار.

 

پەیوەست بەم بابەتەوە: دامەزراوەی 'ڤیزت كوردستان'، هەلی کار بۆ زیاتر لە 500 کەس دەڕەخسینێت، هاوکات دامەزراوەكە کار بۆ دروستکردنی ژێرخانێکی پێویست بۆ کەرتی گەشتیاری لە کوردستان دەکات،  خزمەتگوزارییەکانی وەکو دابینکردنی هۆتێل، شوێنەکانی مانەوە و پلیت بڕین لەسەر وێبسایتێک پێشکەش بە گەشتیارانی بیانی دەکات.

 

زانیاریی زیاتر: ڤیزت کوردستان كار لەسەر چەند پرۆژەیەکی گەشتیاری دەکات، دیارترینیان پرۆژەیەكی تەلەفریکە بە مەودای 10 کیلۆمەتر، كە لە ئیدارەی سۆران جێبەجێ دەكرێت و تا ساڵی 2027  تەواو دەبێت.