نەتەوەیەکگرتووەکان: دەبێت پرسەکانی نێوان کوردستان و عێراق بەپێی دەستوور یەکلایی بکرێنەوە

ئاڤا نیوز

ئەنجوومەنی ئاسایشی نەتەوەیەکگرتووەکان لەسەر ماف و قووتی هاوڵاتیانی هەرێمی کوردستان و دۆخی عێراق کۆبوویەوە و داوای کرد، پرسەکانی نێوان هەرێمی کوردستان و عێراق بەپێی دەستوور یەکلایی بکرێنەوە.

وێنە گەورەکە: بە بەشداری نوێنەری تایبەتی سکرتێری گشتی نەتەوەیەکگرتووەکان بۆ عێراق، ئەنجوومەنی ئاسایشی نەتەوەیەکگرتووەکان لەسەر نەناردنی مووچەی هەرێمی کوردستان و دۆخی عێراق کۆبووەوە.

لێدوانی فەرمی: دکتۆر محەممەد ئەلحەسان نوێنەری تایبەتی سکرتێری گشتی نەتەوەیەکگرتووەکان بۆ عێراق لەبەردەم ئەنجومەنی ئاسایشی نەتەوەیەکگرتووەکان ڕایگەیاند، پەیوەندییەکانی هەرێمی کوردستان و عێراق پەیوەندییەکی هاوبەشییە و پێویستی بە گفتوگۆی بەردەوام و هەماهەنگییە و پێویستە ئەم پەیوەندییە بە پێی دەستوور بێت تاوەکو کێشە هەڵواسراوەکانی نێوان هەردوولا چارەسەربکرێت.

- دوای ئەنجامدانی هەڵبژاردنی پەرلەمانی کوردستان بەشێوەیەکی سەرکەوتوو چاوەڕێی پێکهێنانی حکومەتی هەرێمی کوردستان دەکەین و ڕۆحی سازان، گرنگیدان بە ئامانجە هاوبەشەکان، نەک دابەشبوونی حزبی، کلیلی تێپەڕاندنی ئەم دۆخە چەقبەستووە درێژخایەنەیە و لایەنە پەیوەندیدارەکان لە هەرێمی کوردستان دەتوانن حکومەتێک پێکبهێنن کە خزمەت بە بەرژەوەندییەکانی خەڵکی هەرێمی کوردستان و عێراق بە گشتی بکات.

- ئەگەر پڕۆسەی ئاشتی لە نێوان تورکیا و پەکەکە بە نیەتێکی باشەوە جێبەجێ بکرێت، ئەوە ئاشتی و سەقامگیری بۆ ناوچەکە بە گشتی دەگەڕێتەوە.

- عێراق لە ڕێگەدایە بۆ ئەنجامدانی هەڵبژاردن لە مانگی یانزەی ئەمساڵ و کۆمیسیۆنی باڵای سەربەخۆی عێراق کارەکانی بە هاوکاری یونامی دەستپێکردووە بۆ بەڕێوەچوونی هەڵبژاردنێکی شەفاف و ئازاد بە بەشداری هەموو پێکهاتەکانی عێراق.