دابان حەمید : "ڤیزت کوردستان" لە چوارچێوەی ئەجێندای چاکسازی حکومەتە

ئاڤا نیوز

دابان حەمید، بەڕێوەبەری جێبەجێکاری "ڤیزت کوردستان" ڕایدەگەیەنێت، ڤیزت کوردستان پرۆژەیەکی ستراتیژی نیشتیمانییە و لە چوارچێوەی ئەجێندای چاکسازی حکومەتی هەرێمی کوردستانە.

وێنە گەورەکە:  ڤیزت کوردستان دامەزراوەیەکی ناحکومییە و ئامانجی بەرەوپێشبردنی کەرتی گەشتوزاری و ڕاکێشانی گەشتیاری نێودەوڵەتییە بۆ ناوچەکانی هەرێمی کوردستان.

لێدوانی فەرمی: دابان حەمید، بەڕێوەبەری جێبەجێکاری ڤیزت کوردستان، گوتی: لەژێر ڕابەرایەتیی سەرۆکوەزیران مەسرور بارزانی چاکسازی زۆر کراوە،  ڤیزت کوردستانیش لە چوارچێوەی ئەجێندای چاکسازی حکومەتی هەرێمی کوردستانە و بەشێوەی ستانداردی جیهانی دروست کراوە.

- ڤیزت کوردستان پڕۆژەیەکی ستراتیژییە و شار و شارۆچکەکانمان دەبوژێنێتەوە و کاریگەری لەسەر دیبلۆماسیەتمان دەبێت، لەسەر ئاستی نیشتمانی هەرێمی کوردستان پێشدەخات و هەلی کار دەڕەخسێنێت.

- چەند ستونێکمان داناوە "کێ و کەی و چۆن"  سەردانی هەرێمی کوردستان بکات، کار لەسە ئەوە دەکەین تێڕوانین بەرامبەر کوردستان بگۆڕین و وابکەین خەڵک سەردانی بکات.

- لەگەڵ براندە نێودەوڵەتییەکان ڕێککەوتن دەکەین و بالیۆزمان لە دەرەوە دەبێت، کاریش لەو سێکتەرانە دەکەین و کاریگەرییان لە پێشخستنی کەرتی گەشتوگوزار دەبێت.

- وەبەرهێنان لە گەشتوگوزار دەکەین و هەوڵی بنیاتنانی ژێرخانێکی بەهێز دەکەین.