لەسەر سکاڵای هاووڵاتیان بەنزینخانەیەک لە ڕانیە دادەخرێت

ئاڤا نیوز

لەسەر سکاڵای هاووڵاتیان پشکنین بۆ بەنزینخانەی کێوەڕەش لە قەزای ڕانیە کراوە، پاشان بەنزینەکەی لە پشکنین دەرنەچووە و بڕیاری داخستنی لەسەر دراوە.

چیرۆکی سەرەکی: لێژنەی سوتەمەنی قایمقامیەتی قەزای ڕانیە بە هاوبەشی بەشی ئابووری بەرێوەبەرایەتیی ئاسایشی ڕاپەڕین دوای بەدواداچوون بۆ سکاڵای هاووڵاتیان و وەرگرتنی نموونەی بەنزین بۆ پشکنین دەرکەوت بەنزینخانەی کێوەڕەش جۆری بەنزینی نۆرماڵەکەی لە پشکنین دەرنەچووە، بۆ ئەم مەبەستە ڕێکاری پێویست و یاسایی بەرامبەر گیراوەتەبەر، بڕیاری داخستن و پێبژاردنی  بۆ دەرچووە.

لێدوانی فەرمی: کارزان سلێمان، سەرۆکی لیژنەی قایمقامیەتی ڕانیە، بە ئاڤا میدیای ڕاگەیاند، مانگانە لیژنەکانمان پشکنین بۆ بەنزینخانەکان دەکەن، بەنزینخانەی کێوەڕەش سکاڵای هاووڵاتیانی لەسەر بوو، بەنزینی نۆرماڵەکەی براوە بۆ پشکنین، بەڵام لە پشکنین دەرنەچووە، سەرەڕای ئەوەی مۆڵەتی فەرمی هەبووە، بەڵام ئەوە جاری یەکەمی نیە بەنزینەکەی لە پشکنین دەرنەچێت، بۆیە بڕیاردرا بە داخستنی بەنزینخانەکە و پێبژاردنی خاوەنەکەی.

زانیاریی زیاتر: سەرۆکی لیژنەی قایمقامیەتی ڕانیە، دەڵێت، بەپێویستی دەزانین هاووڵاتیان ئاگادار بکەینەوە کە لیژنەی سوتەمەنیمان چاودێرێکی وردی سەرجەم بەنزینخانەکان دەبێت لە کاتی پابەندنەبوون لێکۆلینەوەیان لەگەڵدا دەکرێت.

ئەوەی پێویستە بیزانیت: لە ماوەی ڕابردوو سەرجەم بەنزینخانە لاوەکییەکانی سنووری ڕانیە کە لەسەر شەقامەکان هەبوون و مۆڵەتیان نەبوو لەلایەن لیژنەکانی قایمقامیەتی ڕانیە داخراون کە ژمارەیان نزیکەی 30 بەنزینخانە دەبوون، هاوکات بەشێک لەو بەنزینخانانەی مۆڵەتیان هەبووە و پابەند نەبوونە بە ڕێنماییەکان داخراون کە نزیکەی پێنج بەنزینخانە دەبێت.