د. شاخەوان عەبدوڵڵا: تا دۆسیەی مووچە یەکلایی نەکرێتەوە ڕێگە نادەین دانیشتنی پەرلەمان بکرێت

ئاڤانیوز

جێگری سەرۆکی پەرلەمانی عێراق ڕایدەگەێنێت، ڕێگە نادەین دانیشتنی پەرلەمان بکرێت تا دۆسیەی مووچەی فەرمانبەران یەکلایی نەکرێتەوە.

چیرۆکی سەرەکی: بڕینی مووچەی فەرمانبەران و شایستە داراییەکانی هەرێمی کوردستان لەلایەن حکومەتی عێراق، لەسەر ئاستی ناوخۆ و دەرەوە کاردانەوەی لێکەوتۆتەوە.

لێدوانی فەرمی: د. شاخەوان عەبدوڵڵا، جێگری سەرۆکی پەرلەمانی عێراق گوتی: داوا دەکرێت پەرلەمانی عێراق کۆببێتەوە، بەڵام ئێمە ڕێگە نادەین دانیشتنی پەرلەمان بکرێت تا دۆسیەی مووچەی فەرمانبەران یەکلایی نەکرێتەوە.

- نووسراوەکەی وەزارەتی دارایی عێراق هەڵەی یاسایی زۆری تێدایە و بابەتەکە سیاسیە، نەک بابەتێکی تەکنیکی و ئیداری، ئەم بابەتەشمان لەگەل سەرۆکوەزیرانی عێراق باس کردووە کە نابێت خەڵکی کوردستان برسی بکرێت.

- ئومێدەوارین لە چەند ڕۆژی داهاتوو دادگای فیدراڵی بڕیار لەسەر ناردنی مووچە بدات، چونکە پێش جەژن ڕێکارە یاساییەکان تەواو بووە و لەلایەن فەرمانبەران سکاڵا تۆمار کراوە، بەڵام بەهۆی تەواو نەبوونی ڕێژەی یاسایی دانیشتنی دادگای فیدراڵی نەکرا، بۆیە چاوەڕێین دانیشتنی دادگای فیدراڵی لەسەر ئەم بابەتە بکرێت و بڕیار لە ناردنی مووچە بدرێت.

- سەبارەت بە بڕینی مووچەی فەرمانبەرانی هەرێمی کوردستان، وەزارەتی دەرەوەی ئەمریکا و نوێنەری نەتەوە یەکگرتووەکان هاتوونەتە دەنگ و داوای چارەسەرکردنی ئەم کێشەیە دەکەن.