ئەمریکا بۆ ئاڤا: دەست بە کەمکردنەوەی کارمەندانمان لە عێراق دەکەین

ئاڤا نیوز

سەرچاوەیەکی ئەمریکی بە ئاڤا میدیای ڕاگەیاند، بەهۆی زیادبوونی مەترسییە ئەمنییەکان لە بەغدای پایتەختی عێراق، باڵیۆزخانەی ئەمریکا دەستیکردووە بە ئامادەکاری بۆ کەمکردنەوەی کارمەندەکانیان.

لێدوانی فەرمی: وتەبێژی باڵیۆزخانەی ئەمریکا لە بەغدا بە ئاڤا میدیای ڕاگەیاند: ئەمریکا کارمەندانەکانی لە بەغدا کەم دەکاتەوە و کەمکردنەوەی ستافی ناپێویستی ئەمەریکا لە عێراق، کۆنسوڵخانەی گشتیی ئەمریکا لە هەولێریش دەگرێتەوە و ئێستا تەنیا دەتوانین ئەوە بخەینەڕوو.


لەلایەکی دیکەوە: سەرچاوەیەکی ئەمریکی  و بەرپرسێکی عێراق بە ئاژانسی ڕۆیتەرزیان ڕاگەیاندووە، باڵیۆزخانەی ئەمریکا لە بەغدا ئامادەکاری بۆ چۆڵكردنی بەشێک لە باڵەخانەکەیان دەکەن و زیادبوونی مەترسییە ئەمنییەکان هۆکاری بڕیارەکەیە.

بەتەنیشت ئەم بابەتەوە: عەزیز نەسیر زادە، وەزیری بەرگریی ئێران ڕایگەیاند، ئەگەر گفتوگۆ ئەتۆمییەکان نەگەنە ئامانج و ململانێ لەگەڵ ئەمریکا دروست بێت، تاران بنکە سەربازییەکانی ئەمریکا لە ناوچەکە دەکاتە ئامانج.

ئەوەی پێویستە بیزانیت: بڕیارە لە کۆتایی ئەمساڵ ئەمریکا گەورەترین کونسوڵخانەی خۆی لەسەر ئاستی جیهان لە هەولێر بە ئامادەبوونی مارکۆ ڕوبیۆ، وەزیری دەرەوەی ئەمریکا بکاتەوە.