سەرجەم هۆتێل و مۆتێلەكانی دهۆك بەهۆی زۆری ژمارەی گەشتیاران جمەیان دێت

ئاڤا نیوز

بەهۆی هاتنی نزیكەی 60 هەزار گەشتیار لە ناوچە جیاوازەكانی عێراقەوە، سەرجەم هۆتێل و مۆتێلەكانی دهۆك پڕبوون لە گەشتیار، بەڕێوەبەری گەشتوگوزاری دهۆكیش پێشبینی دەكات تا پشووەكانی كۆتایی هەفتە، ژمارەی گەشتیاران بگاتە 90 هەزار.

چیرۆكی سەرەكی: هاوشێوەی سەرجەم بۆنە و جەژنەكان، لە ڕۆژانی جەژنی قوربانی پیرۆزدا دەیان هەزار گەشتیار لە شارەكانی ناوەڕاست و باشووری عێراق و وڵاتانی دەوروبەر، ڕوویان لە ناوچە گەشتیارییەكانی هەرێمی كوردستان كردووە، زۆرێك لە سەردانیكارانیش لە ڕێگەی گرووپی گەشتیاری هاتوون.

لێدوانی فەرمی: د. خەیرى عەلى ئوسو، بەڕێوەبەری گشتیی گەشتوگوزاری دهۆک تایبەت بە ئاڤا ڕایگەیاند، پلانی پێشوازیكردن لە زۆرترین ژمارەی گەشتیار لە ڕۆژانی جەژندا، بە تەواوی سەركەوتوو بووە و نزیكەی 60 هەزار گەشتیار لە ناوەڕاست و باشووری عێراقەوە ڕوویان لە ناوچە گەشتیارییەكانی پارێزگای دهۆك كردووە.

بەڕێوەبەری گەشتوگوزاری دهۆك پێشبینیش دەكات، لە پشووەكانی كۆتایی هەفتە، ژمارەكە بگاتە 90 هەزار گەشتیار، هەوڵەكانیش بەو ئاڕاستەیەن هاتنی گەشتیار بەردەوام لە هەڵكشان بێت.

ئەوەی پێویستە بیزانیت: لە پارێزگای دهۆك 900 بنكە و شوێنی گەشتیاری هەن، هاوكات 300 ناوچەی سرووشتی هەن كە تایبەتمەندیی گەشتیارییان هەیە، لە ماوەی ساڵانی ڕابردووشدا چەندین پرۆژەی ستراتیژی گەشتیاری لە پارێزگاكە جێبەجێكراون.