میدیای ئیسرائیل: ئەمشەو چاوەڕوانی دەیان مووشەکی بالیستی ئێرانین

ئاڤا نیوز

ئیسرائیل چاوەڕوانی وەڵامی ئێرانە و لە ئامادەکاری بۆ ڕووبەڕووبوونەوەی هەر هێرشێک بەردەوامە،  میدیاکانی ئەو وڵاتە بڵاویان کردووەتەوە چاوەڕوانن ئەمشەو ئێران بە دەیان مووشەکی بالیستی هێرش بکاتە سەر وڵاتەکەیان.

وێنە گەورەکە: هێرشی ئەمڕۆی ئیسرائیل بۆ سەر ئێران کە تا ئێستا بەردەوامە، کاردانەوەی فراوانی لێکەوتووەتەوە، ئێران لەسەر ئاستی هەرەباڵا هەڕەشەی وەڵامدانەوەی تووند دەکات، وڵاتانیش هۆشداری لە هەڵگیرسانی جەنگێکی هەرێمی فراوان دەکەن و چەند کاتژمێری داهاتوو بۆ ڕۆژهەڵاتی ناوەڕاست بە مەترسیدار دادەنێن.

بڵاوکراوەی فەرمی: میدیای ئیسرائیل لەسەر زاری بەرپرسانی باڵای وڵاتەکە بڵاویان کردووەتەوە: چاوەڕوان دەکەین ئەمشەو دەیان مووشەکی بالیستیمان لەلایەن ئێرانەوە ئاراستە بکرێت.

لەلایەکی دیکەوە: بنیامین ناتانیاهۆ، سەرۆكوەزیرانی ئیسرائیل  پێشبینی دەکات ئێران بە زنجیرەیەك هێرشی تووند وەڵامی هێرشەكانی ئەمڕۆی وڵاتەكەی بداتەوە، ئامادەیی وڵاتەکەیشی بۆ وەڵامدانەوەی هێرشەکان دەربڕێت.

باکگراوند: کاتژمێر 03:30 خولەکی بەرەبەیانی ئەمڕۆ ئیسرائیل بە 200 فڕۆکەی جەنگی هێرشێکی فراوانی کردە سەر ئێران. هێرشەکان چەندین پارێزگار و شار و دەیان بنکەی سەربازی و وێستگەی ئەتۆمییان گرتەوە، تاوەکو ئێستا کوژرانی  زیاتر لە 100 كەس و برینداربوونی نزیکەی 400 کەسی دیکە لەلایەن میدیاکان ڕاگەیێنراوە، لەنێویاندا ژمارەیەکیان فەرماندەی باڵای سەربازی و زانای ئەتۆمین، ژمارەی کوژراوان و بریندارانیش بەردەوام لە زیادبوونە.