ئێران چۆن بڕیاری دا هێرشی تۆڵە بکاتە سەر ئیسرائیل؛ خامنەیی دەستبەجێ چی کرد و چی گوت؟

ئاڤا نیوز

دوای ئەوەی ئیسرائیل هێرشەکانی بۆ سەر ئێران دەستپێکرد، ئێران پلانی دانابوو بە دوو هەزار مووشەک وەڵامی ئیسرائیل بداتەوە، بەڵام تەنیا 200 مووشەکی ئاراستەی ئیسرائیل کرد.

وێنە گەورەکە: بەرەبەیانی ڕۆژی هەینی ئیسرائیل هێرشێکی بەرفراوانی کردە سەر دامەزراوە ئەتۆمییەکانی ئێران و ماڵی چەندین سەرکردەی سوپای پاسدارانیشی بە ئامانج گرت و چەندین زانای ناوداریشی لەبواری ئەتۆمی کوشت. 

ئەوەی لەوبارەیەوە دەگوترێت: پێشتر ئێران خۆی بۆ هەر ئەگەرێک ئامادەکردبوو کە لەلایەن ئیسرائیل هێرشی بکرێتە سەر، ئەوە ئێران بە دوو هەزار مووشەک وەڵام دەداتەوە، بەڵام کاتێک ئیسرائیل هێرشی کردە سەر ئێران، تەواوی ئەو سەکۆ مووشەکییانەی تەخت کرد کە ئێران بۆ لێدان لە ئیسرائیل ئامادەی کردبوو، بۆیە ئێران ویستی هەر هیچ نەبێ هەزار مووشەک ئاراستەی ئیسرائیل بکات، بەڵام لەو هەزار مووشەکەش تەنیا توانی 200 مووشەکی ئاراستەی ئیسرائیل کرد.

لەلایەکی دیکەوە: ئەو فەرماندە سەربازییانەی کە چەندین ساڵ پلانیان دانابوو بۆ هێرشەکە و وەڵامدانەوەی ئیسرائیل زۆربەیان لە هێرشەکەی ئیسرائیل کوژران، بەڵام هەر زوو ئێران بەخێرایی جێگرەکانیان لە شوێنی ئەو فەرماندە سەربازییانە دەستنیشانکرد و دەستیان بە وەڵامدانەوە و هێرشی پێچەوانە کرد.

پێدراوە ڕاستەکان: دوای ئەوەی ئێران وەڵامی ئیسرائیلی دایەوە، ئەو ڕاستییەی دەرخست کە هێشتا ئێران توانای سەربازی و مووشەکی هەیە و ناتوانرێ دەوڵەتێکی گەورەی وەکو ئێران بە یەک شەو تێکبشکێنرێت.

ئەوەی پێویستە بیزانیت: دوای هێرشەکانی ئیسرائیل بۆ سەر ئێران، دەستبەجێ خامنەیی هەموو بەرپرس و فەرماندە سەربازییە باڵاکانی کۆکردەوە. لە کۆبوونەوەکەدا ڕای جیاواز دروست دەبێ کە بەشێکیان پێیانوایە بە وەڵامدانەوەی هێرشەکانی ئیسرائیل ئەمریکاش دێتە ناو شەڕەکە، بەڵام بەشێکی دیکەی ناو کۆبوونەوەکە دەڵێن ڕەنگە ئیسرائیل ژێرخانی ئابووری لە نەوت و غاز و شوێنە ستراتیژییەکانی ئێران بۆردوومان بکات و خەڵک هان بدات ڕاپەڕن.

زانیاریی زیاتر: خامنەیی لە کۆبوونەوەکەدا سوور بووە و وتوویەتی، "من وەڵامێکی تووندم دەوێ، ئەگەر بەتووندی وەڵامی ئیسرائیل نەدەینەوە دەشکێین".