سوودانی پەیوەندی بە سەرۆککۆماری ئێران دەکات: ئامادەی هەموو پشتیوانییەکین

ئاڤا نیوز

سەرۆکوەزیرانی عێراق پەیوەندییەکی تەلەفۆنی لەگەڵ سەرۆککۆماری ئێران ئەنجامدا و ڕایگەیاند، عێراق بەپێویستی دەزانێت هەموو هەوڵێک بدرێت تا شەڕ لەوە زیاتر فراوان نەبێت.

 

چیرۆکی سەرەکی: دوێنێ بەرپرسێکی باڵای عێراق ڕایگەیاند، حکومەتی وڵاتەکەی بە فەرمی داوای لە ئێران کردووە لە چوارچێوەی گرژییە سەربازییەکانی نێوان تاران و تەلئەڤیڤ، بەهیچ شێوەیەک بەرژەوەندییەکانی ئەمریکا لە وڵاتەکەیدا نەکاتە ئامانج، تارانیش بەڵێنی داوە گرژییەکان بۆ خاکی عێراق نەگوازێتەوە.

ڕاگەیێنراوی فەرمی: بەپێی ڕاگەیێنراوێک کە نووسینگەی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیران پەیوەندییەکی تەلەفۆنی لەگەڵ مەسعود پزیشکیان، سەرۆککۆماری ئێران ئەنجامدا، لەو پەیوەندییە تەلەفۆنییەدا سەرۆکوەزیران جەختیکردەوە لەوەی عێراق هاوسۆزی گەلی ئێرانە و پێداگریشە لەسەر پاراستنی ئاسایشی ئێران چونکە بەشێکە لە ئاسایشی ناوچەکە.

 

بەشێکی دیکە لە قسەکانی نێوان سوودانی و مەسعود پزیشکیان: 

٠ گەل و حکومەتی عێراق لەگەڵ ئێرانن کە ڕووبەڕووی هێرشی دووژمنکارانی ئیسرائیل بووەتەوە.

 

٠ ئاسایش و ئارامی ئێران پەیوەندی بە ئاسایش و ئارامی ناوچەکەوەیە. عێراق جەخت دەکاتەوە لەوەی جەنگەکە فراوان نەبێت و 

٠  ئامادەی هەموو پشتیوانییەکی ئێرانین لەم دۆخەدا، هەموو هەوڵێکیش دەدەین ئاسمانی عێراق بۆ هێرشکردنە سەر ئێران بەکارنەهێنرێت. 

٠ عێراق ئامادەیە هەموو هاوکارییەکی پێویست پێشکەش بکات بۆ ڕاگرتنی  ئەو جەنگەی ئێران ڕووبەڕووی بووەتەوە، ئەمەش لە چوارچێوەی هەماهەنگی وڵاتانی ئیسلامی.

بۆچوونی بەرامبەر: مەسعود پزیشکیان، سەرۆککۆماری ئێران سوپاسی عێراقی کردووە لە بەرامبەر هەڵوێستی ڕوونیان لە هێرشە بەردەوامەکانی هێرشەکانی ئیسرائیل بەرامبەر گەلانی ناوچەکە.