ئەردۆغان داوا لە سوودانی دەکات عێراق لە جەنگی نێوان ئێران و ئیسرائیل دووربخاتەوە

ئاڤا نیوز

سەرۆککۆماری تورکیا پەیوەندییەکی تەلەفۆنی لەگەڵ سەرۆکوەزیرانی عێراق کرد، جەختی لەوە کردەوە کە "گرنگە عێراق لەو ململانییە دوور بێت و زیاتر وریا بێت بەرامبەر بە گرووپە تیرۆرستییەکان".

وێنە گەورەکە: ڕەجەب تەیب ئەردۆغان، سەرۆککۆماری تورکیا زنجیرەیەک پەیوندی تەلەفۆنی بۆ سەرۆکی وڵاتان کرد، لە نێویاندا لەگەڵ محەممەد شیاع سوودانی، سەرۆکوەزیرانی عێراق قسەی کرد، هەردوولا شەڕی ئێران و ئیسرائیلییان تاوتوێ کرد.

لێدوانی فەرمی: ئەردۆغان لە پەیوەندییە تەلەفۆنییەکەدا وتی: پێویستە عێراق لەو ململانێیە دووربێت و لەو دۆخەدا عێراق لەبەرامبەر گرووپە تیرۆرستییەکان وریاتر مامەڵە بکات.

جەختی لەوە کردەوە، تاکە ڕێگەی چارەسەرکردنی پرسی وزەی ئەتۆم لەنێوان ئێران و ئیسرائیل  ڕێککەوتنە.

ئەردۆغان دووپاتیشی  کردەوە، نابێت ئەم هێرشانەی ئیسرائیل بۆ سەر ئێران، سێبەر بخاتە سەر کۆمەڵکوژییەکەی ئیسرائیل لە غەززە.

ئەوەی پێویستە بیزانیت: بەرەبەیانی ڕۆژی هەینی 13-6-2025، ئیسرائیل زنجیرەیەک هێرشی  بەرفراوانی کردە سەر دامەزراوە ئەتۆمییەکانی ئێران و ماڵی چەندین سەرکردەی سوپای پاسدارانیشی بە ئامانج گرت و چەندین زانای ناوداریشی لەبواری ئەتۆمی کوشت.