حیزبوڵلای عێراقی هه‌ڕه‌شه‌ لە ئەمریکا دەکات

ئاڤا نیوز

کەتیبەکانی حیزبوڵڵای عێراقی هەڕەشە دەکات، و دەڵێت، ئەگەر ئەمریکا لە بەرژەوەندیی ئیسرائیل بەشداریی جەنگی دژی ئێرانی کرد ڕاستەوخۆ به‌رژه‌وه‌ندی و بنكه‌ سه‌ربازییه‌كانی ئه‌مریكا له‌ ناوچه‌كه‌ ده‌كاتە ئامانج.

وێنە گەورەکە: بۆ ماوەی سێ ڕۆژە شەڕی نێوان ئیسرائیل و ئێران بەردەوامە، گرووپە چەکدارەکانی سەر بە ئێران لە عێراق هەڕەشە لە ئەمریکا دەکەن.

لێدوانی فەرمی: ئەبو حوسێن حەمیداوی، ئەمینداری گشتیی حیزبوڵڵای عێراقی لە لێدوانێکدا ڕایگەیاند: کۆماری ئیسلامیی ئێران بۆ ڕاگرتنی قەوارەی زایۆنی پێویستی بە هیچ پاڵپشتییەكی سەربازیی كەس نییە، چونكە بەشی پێویستی پیاو و توانای هەیە بۆ ڕووبەڕووبوونەوەی ئیسرائیل.

زانیاریی زیاتر: بە گوتەی ئەمینداری گشتیی حیزبوڵڵای عێراقی لەنزیكەوە چاودێریی سوپای ئەمریكا دەكەن لە ناوچەكە، ئەگەر ئەمریکا بەشداریی شەڕەکە بکات، ڕاستەوخۆ لە بەرژەوەندی و بنکە سەربازییەکانیان لە ناوچەکە دەدەن.

گۆشەیەکی دیکەی دیمەنەکە: بۆ ڕێگریی لە پەرەسەندنی شەڕەکە، ئەمینداری گشتیی حزبوڵلای عێراقی داوا لە حکوومەتی فیدراڵی و سەرکردەکانی چوارچێوەی هەماهەنگی دەکات، باڵیۆزخانەی ئەمریکا لە بەغدا دابخەن و هێزەکانی ئەمریکا لەناوخۆی وڵاتەکە دەربکەن، چونکە دیارترین و مەترسیدارترین هەڕەشەیە بۆ سەر ئاسایشی عێراق و سەقامگیریی ناوچەکە.