چوارچێوەی هەماهەنگی بۆ پشتیوانیی ئێران داوای خۆپیشاندان دەکات

ئاڤا نیوز

چوارچێوەی هەماهەنگی شیعەکان بە ئامادەبوونی سەرۆکوەزیرانی عێراق کۆبووەوە، بەزاندنی ئاسمانی وڵات سەرکۆنە دەکات و بۆ پشتیوانیی ئێرانیش داوای خۆپیشاندان دەکات.

وێنە گەورەکە: چوارچێوەی هەماهەنگی پێکهێنەری سەرەکی حکومەتی عێراقە، ئەم هاوپەیمانێتییە شیعیە بە دۆستایەتی نزیکی لەگەڵ ئێران ناودەبرێت، ڕەخنەگرانی چوارچێوەی هەماهەنگی دەڵێن، لە هەندێک لە هەڵوێستەکانیدا بۆ بەرژەوەندی ئێران، ڕەچاوی بەرژەوەندی عێراقی نەکردووە.

ڕاگەیێنراوی فەرمی: شەوی ڕابردوو سەرکردەکانی چوارچێوەی هەماهەنگی بە ئامادەبوونی محەممەد شیاع سوودانی، سەرۆکوەزیرانی عێراق کۆبوونەوە و لە ڕاگەیێنراوێکدا ئاماژە بەوە دەکەن، سەرکۆنەی دەستدرێژییەکانی ئیسرائیل بۆ سەر ئێران دەکەن و داوا لە وڵاتانی ناوچەکە و کۆمەڵگەی نێودەوڵەتیی دەکەن دژی ئەم هێرشانە بوەستنەوە و ئیسرائیل ناچار بە ڕاگرتنی هێرشەکان بکەن.

زانیاریی زیاتر: سەرکردەکانی چوارچێوەی هەماهەنگی داوای خۆپیشاندان دەکەن بۆ سەرکۆنەکردنی هێرشەکانی ئیسرائیل و پشتیوانی خۆڕاگری و وەڵامدانەوەکانی ئێران بۆ هێرشەکان، ڕەتیشیدەکەنەوە ئاسمانی عێراق بۆ هێرشکردنەسەر وڵاتانی دراوسێ بەکاربهێنرێت.