پرۆسەی گەڕاندنەوەی گەشتیارانی دوورگەی کیش دەستپێدەکات

ئاڤا نیوز

شەوی ڕابردوو پرۆسەی گەڕاندنەوەی ئەو گەشتیارانەی لە دوورگەی کیش گیریانخواردبوو دەستیپێکرد و لە ماوەی نزیکەی 70 کاتژمێر دەگەنەوە هەرێمی کوردستان.

چیرۆکی سەرەکی: لە ڕۆژی هەینییەوە جەنگی نێوان ئیسرائیل و ئێران دەستیپكردووە، ئەمەش بووە هۆی وەستانی گەشتە ئاسمانییەکانی عێراق و چەند وڵاتێکی ناوچەکە و نزیکەی 100 گەشتیاری هەرێمی کوردستان لە دوورگەی کیش گیریان خواردبوو ، شەوی ڕابردووش پرۆسەی گەڕاندنەوەی ئەو گەشتیارانە بە ڕێگەی ئاوی دەستیپێکرد.

لێدوانی فەرمی: عیمران ئەمیر، ڕێبەری گەشتیاری کۆمپانیای زەمالە بە ئاڤای گوت: ئەو گەشتیارانەی لە دوورگەی کیش گیریان خواردبوو ، شەوی ڕابردوو لە ڕێگەی کەشتیەوە گوازرانەوە بەندەری چارەک ، دواتریش بە ڕێگەی وشکانی دەیانگەڕێنینەوە.

زانیاریی زیاتر: گەشتیارەکان لە بەندەر چارەکەوە لە پارێزگای هورمزگان لە ئێران بە پاس دەگوازرێنەوە و لە ڕێگەی مەرزی شەلەمچە دێنەوە ناو خاکی عێراق لە بەسرە، لەوێشەوە بە پاس دەگەڕێنەوە هەرێمی کوردستان، گەشتەکەیان نزیکەی 70 کاتژمێر دەخایەنێت.

بە تەنیشت ئەم بابەتەوە: حکومەتی هەرێمی کوردستان لە ڕێگەی فەرمانگەی پەیوەندییەکانی دەرەوە و وەزارەتی ناوخۆ لیژنەیەکی دروست کردووە بۆ گەڕاندنەوەی ئەو هاونیشتمانیانەی هەرێمی کوردستان کە بەهۆی وەستانی گەشتە ئاسمانییەکان لە دەرەوەی وڵات گیریان خواردووە.