ڕاوێژکارێکی سوودانی: هەڵبژاردنی پەرلەمانی عێراق لە وادەی خۆیدا دەکرێت

ئاڤا نیوز

لەکاتێکدا جەنگی نێوان ئێران و ئیسرائیل بەردەوامە و لەهەڵکشانە، ڕاوێژکارێکی سوودانی دەڵێت: " هەڵبژاردنی پەرلەمانی عێراق لە وادەی خۆیدا دەکرێت و هیچ ململانێیەک کاریگەری لەسەر نابێت."
  
وێنە گەورەکە: بڕیارە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بکرێت، کۆمیسیۆنی باڵای سەربەخۆی هەڵبژاردنەکانیش بەردەوامە لە ڕێککارەکان و بۆ ئەو مەبەستەش دەستیکردووە بە وەرگرتنی ناوی پێشکەشکاران وەک کارمەندی ڕۆژی دەنگدان.

 

لێدوانی فەرمی: حوسێن عەللاوی، ڕاوێژکاری سەرۆک وەزیران، ڕایگەیاند:  تاوەکو ئێستا ئامادەکارییەکان بۆ پرۆسەی هەلبژاردنی پەرلەمانی عێراق بەشێوەیەکی زۆر باش بەڕێوەدچێت، حکومەتیش سەرکەوتوبووە لە دەستەبەرکردنی کەشێکی گونجاو بۆ بەردەوامبوونی پرۆسەکە.

 

زانیاریی زیاتر: عەللاوی ئاماژەی بەوەشکرد، حکومەت پابەندە بەوەی هەڵبژاردنی پەرلەمانی عێراق لە وادەی دیاریکراوی خۆی بەڕێوەبچێت و هیچ پێشهاتەیەکی ئەمنی و سەربازی ناوچەیی کاریگەری لەسەر نابێت.

 

زانیاریی بەدەستهاتوو: ئاراستەی محەممەد شیاع سوودانی سەرۆکوەزیرانی عێراق و حکومەتەکەی لەگەڵ ئەنجام دانی هەڵبژاردنەکەیە لەوادەی دیاریکراوی خۆیدا، بەڵام بەپێی شرۆڤەکاران و هەندێک لایەنی سیاسی ئەگەر جەنگی نێوان ئێران و ئیسرائیل بەم شێوەیەی ئێستا بەردەوام بێت کاریگەری لەسەر پڕۆژەکە دروست دەکات.