وەزارەتی تەندروستیی دەنگۆیەک ڕەتدەکاتەوە

ئاڤا نیوز

دوابەدوای بڵاوبوونەوەی هەواڵێك لە سۆشیاڵ میدیا لەماوەی ڕابردوو، گوایە هاووڵاتییەك بەهۆی بەكارهێنانی ژیری دەستكرد گیانی لەدەستداوە، وەزارەتی تەندروستی ئەمە بە پڕوپاگەندە ناودەنێت و ڕەتیدەکاتەوە.

چیرۆک سەرەکی: لە ماوەی ڕابردوو قوتابییەکی زانکۆی سەڵاحەددین گیان لەدەست دەدات، دوای ئەو ڕووداوە دەنگۆی ئەوەی بڵاو دەبێتەوە کە داوای هاوکاری لە ژێری دەستکرد کردووە کە دەرمانێکی بۆ دەستنیشان بکات ئەویش دەرمانەکە بەکاردەهێنێت  و دواتر گیان لەدەست دەدات، هەر دوای بڵاوبوونەوەی دەنگۆکە بنەماڵەی کۆچکردوو و زانکۆی سەڵاحەددین دەنگۆکەیان ڕەتکردەوە، ئەمڕۆش وەزارەتی تەندروستی بە پروپاگەندەی سۆشیال میدیا ناوی دەبات.

ڕاگەیێنراوی فەرمی: وەزارەتی تەندروستیی حکومەتی هەرێمی کوردستان، ڕایگەیاند، "وەزارەتمان بەدواداچوونی تەواوی بۆ بابەتەكە كردووە و زانیاریی تەواوی لە كەسە نزیكەكانی كۆچكردوو و نەخۆشخانە وەرگرتووە، دەرەنجام گەیشتینە ئەو ڕاستییەی کەوا ئەم هەواڵە ڕاست نیە بەداخەوە چەندین ڕاگەیاندن و پەیجی سۆشیاڵمیدیا بەبێ گەڕانەوە بۆ لایەنی فەرمی کە وەزارەتی تەندروستییە تەنها ڕۆڵی گواستنەوەی ئەو پڕوپاگەندەیان کرد".

-  "بەپێویستی دەزانین دوو پەیام بۆ بەرژەوەندی گشتی بخەینەڕوو:

یەکەم: پێویستە هاووڵاتیان هیچ دەرمانێك یان پێداویستیی پزیشکی بەبێ ڕاوێژی پزیشكی بۆ چارەسەر وەرنەگرن ئەگەر شوێنی فەرمی نەبێت، هەروەها گوێ لە هیچ ڕیکلامێکی ئۆنڵاین و سۆشیاڵمیدیا نەگرن کە بەبێ مۆڵەت و بەشێوەی نایاسایی دەرمان دەفرۆشنەوە بە هاووڵاتییان.

- لەڕووی پزیشکییەوە ئامرازی زیرەکی دەستکرد بەبێ پشکنینی پزیشکی و بینین و ڕاوێژی پزیشکی هەڵەی پزیشکی لێ دەکەوێتەوە.

دووەم:  ڕاگەیاندنەکان و پەیجەکانی سۆشیاڵ میدیا پێویستە لەگەڵ لایەنی فەرمی بەدواداچوون بکەن پێش بڵاوکردنەوەی ئەم جۆرە هەواڵانە.