بەرپرسێکی ئەمریکی: ئیسرائیل مووشەکی بەرگریی کەمبووەتەوە

ئاڤا نیوز 

ڕۆژنامەی وۆڵ ستریت جۆرناڵ لە زاری بەرپرسێکی ئەمریکییەوە بڵاویکردەوە، واشنتن چەند مانگێکە ئاگاداری کێشەی تواناکانی بەرگریی ئیسرائیلە و کاردەکات بۆ بەهێزکردنی سیستمی بەرگریی ئەو وڵاتە.

 

وێنە گەورەکە: سەرچاوە هەواڵگرییەکانی ئەمریکا و ئیسرائیل باس لەوە دەکەن؛ سیستمی بەرگریی ئیسرائیل تاوەکو 11 ڕۆژی دیکە توانای بەرپەرچدانەوەی هێرشەکانی ئێرانی هەیە.

 

لێدوانی فەرمی: بەرپرسێکی ئەمریکی کە نەیویستووە ناوی ئاشکرا بکرێت بە ڕۆژنامە ئەمریکییەکەی ڕاگەیاندووە، ئیسرائیل قەیرانی کەمیی مووشەکی بەرگریی هەیە، ئەمەش نیگەرانی لەسەر توانای ئەو وڵاتە بۆ بەرپەرچدانەوەی مووشەکە بالیستییە دوورمەوداکانی ئێران دروستکردووە.

 
ئاماژەی بەوەشکردووە، ئەمریکا لە دەریا و وشکانی و ئاسمانەوە کاری کردووە بۆ ئەوەی بەرگریی ئەو وڵاتە بەرامبەر هێرشەکانی ئێران بەهێزبێت.

 

باکگراوند: ئیسرائیل و ئێران بۆ شەشەمین ڕۆژی لەسەریەک بەردەوامن لە هێرشەکانیان بۆ سەر یەکتر، ئەمەش لە ڕووبەڕووبوونەوەیەکی بێ وێنەی نێوان ئەو دوو زلهێزەی ناوچەکەدا.

 

بەرەبەیانیی ئەمڕۆ ئێران بۆ یەکەمجار مووشەکی هایپەرسۆنیکی فەتاح یەک، کە یەکێک لە کاریگەرترین چەکەکانییەتی، لەدژی ئیسرائیل بەکارهێنا و دەڵێ بەهۆیەوە زیانی لەو وڵاتە داوە. 

مووشەکی هایپەرسۆنیکی فەتاح یەک، بە گرنگترین و پێشکەوتووترین چەکی سوپای پاسداران دادەنرێت بەهۆی زۆریی خێراییەکە، کە لە ساڵی 2023ـدا پەردەی لەسەر لادرا. ئێران دەڵێ ئەو مووشەکە بۆ ئەوە دیزایین کراوە سیستەمی بەرگریی زۆر پێشکەوتووی وەکو گومەزی پۆڵایینی ئیسرائیل ببڕێت.