عێراق ژوورێکی ئۆپەراسیۆن بۆ بەرەنگاربوونەوەی هەڕەشەکانی تیشکی ئەتۆمی کارا دەکات

ئاڤا نیوز

عێراق ژوورێکی فریاکەوتن بۆ بەرەنگاربوونەوەی هەر حاڵەتێکی نەخوازراو  لەئەگەری هێرشی سەربازی ئیسڕائیل بۆ سەر دامەزراوە ئەتۆمییەکانی ئێران کارا دەکات.

مه‌ترسیه‌ پێشبینكراوه‌كان: ڕوانگەی سەوزی عێراق ئاشکرای کرد، هەردوو دامەزراوەی ئەتۆمیی "نەتەنز" و "بوشەهر" ، زۆرترین مەترسی پیسبوونی تیشکدەری لەسەر عێراق هەیە، بەڵام دامەزراوەی ئەتۆمی "فۆردۆ" کە زیاتر لە 60% یۆرانیۆمی تێدا پیتێنراوە بەهۆی هەڵکەوتەی جوگرافی لە نێوان زنجیرە شاخێکدا دەستی هێرشە ئاسمانییەکانی ئیسرائیلی پێنەگەیشتووە و مەترسی تیشکی کوشندەی لەسەر نییە .

لێدوانی فەرمی: ئەحمەد خدر، وتەبێژی دەستەی نیشتمانی بۆ ڕێکخستنی ئەتۆمی و تیشک و کیمیایی و بایۆلۆجی بەئاڤا میدیای ڕایگەیاند: ماوەی دوو ڕۆژە ژوورێکی ئۆپەراسیۆن لە سەرجەم دامودەزگا حکومییەکان پێکهاتووە، بۆ چارەسەرکردنی هەر دزەکردن و بڵاوبوونەوەیەکی تیشکی ژەهراوی.

زانیاریی زیاتر: وێستگەی چاودێریکردن لە سەرجەم پارێزگاکانی هاوسنووری ئێران بە سلێمانی و هەولێریشەوە چالاککراون و ڕۆژانەش ڕاپۆرتی هەڵسەنگاندنی دۆخەکە پێشکەش بە ژووری ئۆپەراسیۆنەکان دەکرێت، ئەحمەد خدر ئەمەشی ڕاگەیاند.

لەلایەکی دیکەوە: سەباح حوسەینی، بەڕێوەبەری پاراستن و تیشکدانەوە لە دەستەی نیشتمانیی ڕێکخستنی ئەتۆمی ئاشکرای کرد: لەگەڵ بەردەوامبوونی جەنگی نێوان ئێران و ئیسرائیل، دەستەی نیشتمانیی ڕێکخستنی ئەتۆمی بەردەوامە لە چاودێریکردنی دۆخەکە لە ڕێگەی تۆڕی ئاگادارکردنەوەی پێشوەختە کە لە سەرانسەری وڵات و سنوورەکان جێگیرکراوە .