ترەمپ: تا ئێستا شەڕمان نەکردووە بەڵام پێویست بکات دەیکەین

ئاڤا نیوز

دۆناڵد ترەمپ، سەرۆکی ئەمریکا دەڵێت، من بە دوای شەڕەوە نیم، بەڵام ئەگەر دۆخەکە لە نێوان شەڕ و ئێرانی ئەتۆمیدا بێت، ئەوا دەبێت ئەوە بکەم کە پێویستە بیکەم، لەوانەیە ئەوکات شەڕ بکەین.

وێنە گەورەکە: جەنگی ئیسرائیل و ئێران بەردەوامە و ئەمریکاش هۆشداری بە ئێران دەدات کە بەبێ مەرج بگەڕێتەوە سەر مێزی گفتووگۆ و کۆتایی بەم جەنگە بهێنێت.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: تاوەکو ئێستا بڕیاری یەکلاکەرەوەم لەبارەی هێرشکردنە سەر ئێران نەداوە و ئەگەر پێویست بکات شەڕیش دەکەم، بەڵام ناهێڵم چەکی ئەتۆمییان هەبێت، هەروەها ئاگربەستمان ناوێت سەرکەوتنێکی یەکجارەکیمان دەوێ.

ترەمپ ئەمانەشی وت:

٠ ئێمە باشترین چەک و سیستمی سەربازیمان هەیە لە جیهاندا، بە ڕادەیەکی زۆر لە پێشەوەین، کەسیش تەنانەت لێمانەوە نزیک نییە، هەندێک وڵاتیش سوودیان لەوە بینیوە، ئیسرائیلیش چەکی باشی هەیە، دەبینین چی دەبێت، من پرسیاری زۆرم لەو بارەوە لێ کراوە، هەمووان دەپرسن، بەڵام هێشتا بڕیارم نەداوە.

٠ ئەگەری ڕێککەوتنێک هەبوو و لەوەوە نزیک بووین، بەڵام ئەوە جێگەی شەرمە کە نەکرا، لەوانەشە ئەوە ڕووبداتەوە، ئەوان ویستوویانە بێن و من ببینن لە کۆشکی سپی، ئەوە شتێکی گەورەیە، بەڵام زۆر درەنگە.

٠ من بە دوای شەڕەوە نیم، بەڵام ئەگەر دۆخەکە لە نێوان شەڕ و ئێرانی ئەتۆمیدا بێت، ئەوا دەبێت ئەوە بکەم کە پێویستە بیکەم، لەوانەیە ئەوکات شەڕ بکەین، ئێمە بە هیچ شێوەیەک شەڕمان نەکردووە، ئیسرائیل زۆر بە باشی کارەکەی کردووە، بەڵام بزانین چی دەبێت، ئێران نابێت چەکی ئەتۆمی هەبێت.

٠ ئێمە بە دوای ئاگربەستەوە نین، ئێمە بە دوای سەرکەوتنێکی تەواو و گشتگیرەوەین، دەزانن سەرکەوتن چیە؟ نەبوونی چەکی ئەتۆمییە.