پەیامێک لە سیستانییەوە لەبارەی جەنگی ئیسرائیل و ئێران

ئاڤا نیوز

عەلی سیستانی، مەرجەعی باڵای شیعەکانی عێراق ڕایگەیاند، داوا لە وڵاتانی جیهان دەکات چارەسەرێکی  ئاشتیی و دادپەروەرانە بۆ بەرنامە ئەتۆمییەکەی ئێران بدۆزنەوە، هەڕەشەی ئیسرائیلیش بۆ بە ئامانجگرتنی سەرکردە باڵاکانی ئێران بە مەترسیدار ناودەبات و وەک هەوڵێک بۆ دروستکردنی پشێووی لە ناوچەکەدا لە قەڵەمی دەدات.

وێنە گەورەکە: سیستانی بەوە ناسراوە کە لەسەر ڕووداو و پێشهاتەکان کەمترین قسە و لێدوان دەدات، بەڵام لەماوەی هەفتەیەکدا ئەوە دووەمینجارە لەسەر هێرشی ئیسرائیل بۆسەر ئێران پەیامی دەبێت، لە هەردوو پەیامەکەشیدا داوای ڕاگرتنی هێرشەکانی ئیسرائیل دەکات.

ڕاگەیێنراوی فەرمی: نووسینگەی عەلی سیستانی، مەرجەعی باڵای شیعەکانی عێراق لە پەیامێکدا ئەوەی خستووەتەڕوو، بەردەوامی هێرشەکانی سەر ئێران و هەڕەشەی بە ئامانجگرتنی سەرکردە ئاینیی و سیاسییە باڵاکانی ئەو وڵاتە سەرکۆنە دەکات، هۆشداریش دەدات لە هەنگاوێکی تاوانکاریی لەو شێوەیە کە پێچەوانەی پێوەرە ئاینیی و ڕەوشتییەکانە و پێشێلکردنی یاسا نێودەوڵەتییەکانە، جەختیش دەکاتەوە کە هەنگاوێکی لەو شێوەیە دەبێتەهۆی ئەوەی دۆخەکە لەکۆنتڕۆڵ دەربچێت و پشێووی سەرهەڵبدات، ئەوەش نەهامەتی گەلان زیاتر دەکات و زیانیش بە بەرژەوەندی هەمووان دەگەیێنێت.

زانیاریی زیاتر: سیستانی بانگەواز لە هەموو لایەنە نێودەوڵەتییەکان، وڵاتانی جیهان و وڵاتانی ئیسلامیش دەکات هەوڵەکان بۆ ڕاگرتنی ئەم جەنگە چڕبکەنەوە و چارەسەرێکی ئاشتیی و دادپەروەرانە بۆ دۆسیەی ئەتۆمی ئێران بەگوێرەی یاسا نێودەوڵەتییەکانە بدۆزنەوە.