وەزیری بەرگریی ئیسرائیل هەڕەشەی چڕکردنەوەی هێرشەکانی دژ بە ئێران دەکات

ئاڤا نیوز

هەفتەیەکە ئیسرائیل ئۆپەراسیۆنی سەربازی خۆی دژ بە ئیسرائیل دەستپێکردووە، وەزیریی بەرگریی ئیسرائیلیش ئاشكرای دەکات لەمەودوا ئۆپەراسیۆنەکان دژ ئامانجە ستراتیژیی و حکومییەکان چڕتر دەکرێنەوە.

چی ڕوودەدات: بەرەبەیانی ئەمڕۆ پێنجشەممە ئێران هێرشی کردە سەر نەخۆشخانەیەکی تایبەت بە سەربازانی برینداری شەری غەززە و سوپای پاسدارانیش لەبارەی هێرشەکە وتیان، ئامانجی سەرەکیی هێرشەکە، بارەگای گەورەی فەرماندەیی و ناوەندی هەواڵگریی سوپای ئیسرائیل بووە کە دەکەوێتە تەنیشت نەخۆشخانەکە.

لێدوانی فەرمی: یسرائیل كاتز، وەزیری بەرگریی ئیسرائیل لە ئێکس ڕایگەیاند، ''من و سەرۆکوەزیرانی ئیسرائیل فەرمانمان كرد بە چڕكردنەوەی هێرشەکان بۆ سەر ئامانجە ستراتیژی و ئامانجە حکومییەکان لە تاران، بۆ نەهێشتنی هەڕەشەکانیان و لەناوبردنی ڕژێمەكەیان، ئێران بەمەبەست نەخۆشخانەو باڵەخانەكانی نیشتەجێبوون لە ئیسرائیل دەکاتە ئامانج".

زانیاریی زیاتر: کاتز لە درێژەی نووسراوەکەدا دەڵێت، ئێران تاوانی جەنگ لە مەترسیدارترین جۆری ئەنجام دەدات، بەرپرسانی ئێران دەبێت بەرپرسیاریەتی تاوانەکانیان هەڵبگرن''.