گوتەبێژی یەکێتی: کاتی هاتووە لەگەڵ پارتی کۆببینەوە

ئاڤا نیوز

گوتەبێژی یەکێتی بەپێویستی دەزانێت لەگەڵ پارتی لەبارەی پرسی هەڵبژاردن و چەند بابەتێکی دیکە کۆببنەوە.

وێنە گەورەکە: دوای دەربڕینی ناڕەزایی لەبارەی شێوازی هەڵبژاردن، پارتی بڕیاری داوە سەردانی سەرجەم حیزب و لایەنەکان بکات و نیگەرانییەکانی خۆی ڕوون بکاتەوە، تائێستاش سەردانی یەکگرتووی ئیسلامی و بزووتنەوەی گۆرانی کردووە.

لێدوانی فەرمی: سەعدی ئەحمەد پیرە، گوتەبێژی یەکێتی بە ئاڤا نیوزی گوت: کاتی ئەوە هاتووە پارتی و یەکێتی کۆببنەوە، بەڵام هیچ زانیارییەکم لەبارەی کاتی کۆبوونەوەکە پێنەگەیشتووە.

بابەتی ستراتیژی: گوتەبێژی یەکێتی باسی ڕاگەیێنراوەکەی پارتی کرد لەبارەی هەڵبژاردن و ئاماژەی بۆ ئەوە کرد پێیان باش نییە بایکۆت بکات. گوتیشی: "خەڵکێکی زۆر بە سەرسوڕمانەوە سەیری بڕیارەکە دەکەن و نیگەرانن".

بۆچی گرنگە: لەکاتێکدا هەرێمی کوردستان بە دۆخێکی سەختدا تێدەپەڕێت، خەڵک چاوەڕێی هەواڵی خۆشە لە پارتی و یەکێتی بۆ تێپەڕاندنی قەیرانەکان.

باکگراوند: دوایین کۆبوونەوەی پارتی و یەکێتی سەرەتای مانگی ڕابردوو بوو لە دەباشان ، تێیدا پرسی مووچە و دیاریکردنی پارێزگاری کەرکووک و چەند بابەتێکی دیکەیان تاوتوێ كرد.