ئامێرى پشکنینی تیشکدانەوەى ئەتۆمى لە پارێزگاکانى عێراق جێگیر دەکرێت

ئاڤا نیوز

دەستەى نیشتمانیى چاودێریى ئەتۆمى و کیمیایی و بایلۆجىی عێراق دەڵێت، ڕێوشوێنی تووندی چاودێریکردن لەسەر سنووری ئێران گیراوەتەبەر بۆ چاودێریکردنی ماددە تیشکدەرە ئەتۆمییەکان. دەشڵێت، ئامێرى پشکنینی تیشکدانەوەى ئەتۆمى لە پارێزگاکانى عێراق جێگیر دەکرێت.

وێنە گەورەکە: جەنگی نێوان ئیسرائیل و ئێران بەردەوامە، ئیسرائیل چەندین وێستگە و دامەزراوەی ئەتۆمی ئێرانی کردووەتە ئامانج و مەترسیی بڵاوبوونەوەی ماددەی تیشکدەری ئەتۆمی لە ناوچەکە هەیە. حکومەتی عێراق تیمە تایبەتمەندییەکانی خستووەتە حاڵەتی ئامادەباشییەوە.

ڕاگەیێنراوی فەرمی: دەستەکە لە ڕاگەیێنراوێکدا دەڵێت، بەهۆی پەرەسەندنەکانی نێوان ئێران و ئیسرائیل ڕێکارەکانی تەکنیکی و چاودێریکردن لە دەروازە سنوورییەکانی لەگەڵ ئێران چڕ کردووە بە تایبەتی لە پارێزگای بەسرە.

تیمەکانی پشکنینی ماددە تیشکدەرەکان و ژووری فریاکەوتنی تیشکدانەوە بە تەواوی ئەندامەکانیان، بە درێژایی کاتژمێر بە بەکارهێنانی ئامێرەکانی چاودێری تیشک بۆ دەستنیشانکردنی هەر نیشانەیەکی پیسبوون یان تیشکدانەوەیەکی نائاسایی کاردەکەن، بە هاوکاری لایەنە ئەمنی و گومرگییەکان.

کاریگەریی و لێکەوتەکان: بەرکەوتن بە تیشکی ئەتۆم دەبێتە هۆی کۆمەڵێک کێشەی تەندروستی، لەوانە زیادبوونی مەترسی تووشبوون بە شێرپەنجە  و نەخۆشییە درێژخایەنەکانی دیکە.