ترەمپ: بۆ گەیشتن بە ڕێککەوتن ئامادەم لەگەڵ سەرۆکی ئێران کۆببمەوە

ئاڤا نیوز

سەرۆکی ئەمریکا لەڕێگەی سەرۆکی تورکیاوە ئامادەیی وڵاتەکەی بۆ بەردەوامیدان بە دانوستاندن و کۆبوونەوەکانی نێوان ئەمریکا و ئێران ڕادەگەیەنیت و دەڵێت، ئەگەر پێویست بکات ئامادەم لەگەڵ لەگەڵ سەرۆکی ئێران کۆببمەوە.

وێنە گەورەکە: ئێوارەی ئەمڕۆ عەباس عێراقچی، وەزیری دەرەوەی ئێران لەگەڵ ڕەجەب تەیب ئەردۆغان، سەرۆکی تورکیا کۆبوویەوە و بارودۆخی ئێستای ڕۆژهەڵاتی ناوڕاست و جەنگی نێوان ئیسرائیل و ئێرانیان تاوتووێ کرد، سەرۆکی تورکیا لەکۆبوونەوەکەدا بە عەباس عێراقچی ڕاگەیاند، باشترین چارەسەر بۆ دۆخی ئێستا، گەڕانەوەی ئێرانە بۆ گفتوگۆ و دانوستاندنەکان.

بڵاوکراوەی فەرمی: میدیاکانی ئەمریکا ئێوارەی ئەمڕۆ بڵاویانکردەوە، ڕاستەوخۆ دوای کۆبوونەوەی لەگەڵ عەباس عێراقچی، ئەردۆغان پەیوەندی بە دۆناڵد ترەمپ، سەرۆکی ئەمریکاوە کردووە و پێی ڕاگەیاندووە، ئێرانییەکان دەیانەویت کۆبوونەوەت لەگەڵ ئەنجام بدەن، دۆناڵد ترەمپیش لە وەڵامدا گوتوویەتی، "ئامادەم جەی دی ڤانس، جێگری سەرۆکی ئەمریکا و ستیڤ ویتکۆڤ، نێردەی تایبەتی سەرۆکی ئەمریکا بۆ کۆبوونەوە لەگەڵ ئێرانییەکان بۆ ڕۆژهەڵاتی ناوەڕاست  بنێرم".

زانیاریی زیاتر: ترەمپ بە ئەردۆغانی ڕاگەیاندووە، ئەگەر پێویست بکات، "ئامادەم لەگەڵ مەسعوود پزیشکیان، سەرۆکی ئێران بۆ گەیشتن بە ڕێککەوتنی ئاشتی کۆببمەوە".