ئیسرائیل هێرش دەکاتە سەر پۆلیسی فەتا

ئاڤا نیوز

دوو ڕۆژ پێشتر سوپای ئیسرائیل هێرشێکی کردووەتە سەر بارەگای سەرەكی پۆلیسی فەزای بەرهەمهێنان و ئاڵوگۆڕی زانیارییەكانی فەرجا (پۆلیسی فەتا) کە بە سێیەم گرنگترین ناوەندە ئەمنییەكانی ئێران هەژمار دەكرێت.

بۆچی گرنگە: پۆلیسی فەتا لقێكی زۆر گرنگە لە فەرماندەیی هێزە ئینتزامییەكانی كۆماری ئیسلامی و لە دوای ئیتلاعاتی سوپا و وەزارەتی ئیتلاعات، بە یەكێك لە ناوەندە ئەمنییەكانی ئێران هەژمار دەكرێت و لە ساڵی 2010 دروست كراوە.

ئەوەی لەبارەیەوە دەگوترێت: سوپای ئیسرائیل دوو ڕۆژ پێش ئێستا هێرشەکەی کردووە، بارەگای سەرەكی پۆلیسی (فەزای بەرهەمهێنان و ئاڵوگۆڕی زانیارییەكانی فەرجا)ی بۆردوومان کردووە، كە خۆیان بە كورتی پێی دەڵێن (پۆلیسی فەتا).

پێدراوە ڕاستەکان: بارەگای پۆلیسی فەتا لە ناوچەی 22ـی تارانی پایتەختی ئێران هەڵكەوتووە و كاری ئەم دەزگایە هێرشی سایبری و لێکۆڵینەوەیە لە تاوانەکانی ئینتەرنێتی و زانیارییە وردەکانی هاووڵاتیانی ئێرانی.

هاوکات، هەرچی چالاكییەك پەیوەندی بە ئەنتەرنێتەوە بێت، هەر زانیارییەك كە داخڵی ئەنتەرنێت بكرێت، هەمووی لە ژێر چاودێری ئەم پۆلیسی فەتایەیە.

ئەوەی پێویستە بیزانیت: هەموو هێرشە سایبرییەكانی ئێران بۆ سەر گرووپ و وڵاتانی دژ بە كۆماری ئیسلامی، لەم پۆلیسەوە ئەنجام دەدرێت. هەروەها لە خۆپێشاندانەكانی نێو ئێران پۆلیسی فەتا ڕۆڵێكی گەورەی لە چاودێری خۆپێشاندەران و گرتنیان هەبوو.

زانیاریی زیاتر: ساڵی 2023 ئوسترالیا پۆلیسی فەتای خستە نێو گەمارۆ ئابوورییەكانی خۆیەوە.