ترەمپ: بەرنامە ئەتۆمییەکەی ئێران کۆتاییهات

ئاڤا نیوز

 

سەرۆکی ئەمریکا دوای بەئامانجگرتنی بنکە ئەتۆمییەکانی ئێران لەلایەن هێزی ئاسمانیی وڵاتەکەیەوە ڕایگەیاند، "بنکە ئەتۆمییەکانی ئێران کۆتاییان هات".

 

وێنە گەورەکە: سەرلەبەیانیی ئەمڕۆ ئەمریکا لەڕێگەی فڕۆکەی بی 52 بنکە ئەتۆمییەکانی ئێرانی بۆردوومان کرد، دوای هێرشەکەش بە چەند کاتژمێرێک، ترەمپ  گوتارێکی لە کۆشکی سپی پێشکەش کرد.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، "هێزەکانمان هێرشێکی زۆر گەورەیان بۆ سەر سێ پێگەی ئەتۆمی ئەنجامداوە، بە تەواوەتی پێگە ئەتۆمییەکانی فۆردۆ، نەتەنز و ئەسفەهان لەناوبران و زۆر دەمێکە زۆر کەس چاوەڕوانی ئەو هەنگاوە بوون".

 

لەبارەی هەماهەنگییەکانیان لەگەڵ ئیسرائیل، ترەمپ گوتی "ئامانجی هێرشەکانمان ڕێگریکردن بوو لەوەی ئێران ببێتە خاوەنی چەکی ئەتۆم و هێرشەکانمان سەرکەوتنی باشیان بەدەستهێنا و پیرۆزبایی لە هەموو سەربازانی ئەمریکا و ئیسرائیل دەکەم و وەک یەک تیم لەگەڵ ئیسرائیل کارمانکردووە".

 

ترەمپ پێیوایە، "ئێستا کاتی ئەوەیە لە ڕۆژهەڵاتی ناوەڕاست ئاشتی بێتە ئاراوە و دەبێت ئێران ئاشتی هەڵبژێرێت و ئاشتی بە ئاسانی نایاتە بوون و ئێمە لە پێناو ئاشتیدا ئەم هەنگاوەمان نا.

 

ترەمپ ستایشی توانا سەربازییەکانی وڵاتەکەی کرد و گوتی، "هیچ هێزێکی سەربازی بوونی نییە کە بتوانێت وەک ئەمریکا ئۆپراسیۆنێکی لەمشێوەیە ئەنجامبدات".