حکومەتی عێراق بەبێ ئەوەی ناوی ئەمریکا بهێنێت هێرشەکەی سەر ئێران سەرکۆنە دەکات

ئاڤا نیوز

 

حکومەتی عێراق هێرشەکانی بەرەبەیانیی ئەمڕۆ بۆ سەر دامەزراوە ئەتۆمییەکانی ئێران سەرکۆنە دەکات و ڕایگەیاند، ئەم پێشهاتە ئارامییی رۆژهەڵاتی ناوەڕاست دەخاتە مەترسییەکی ڕاستەقینەوە.

 

وێنە گەورەکە: لە پێشهاتێکی نوێدا و لە 10ـیەمین ڕۆژی جەنگی نێوان ئیسرائیل و ئێران، سەرلەبەیانیی ئەمڕۆ ئەمریکا سێ دامەزراوە سەرەکییەکەی تایبەت بە بەرنامە ئەتۆمییەکەی ئێران (فۆردو، ئەسفەهان و نەتەنز)ـی بە ئامانج گرت، ئەوەش کاردانەوەی لەسەر ئاستی جیهان لێکەوتەوە و وەک پێشهاتێکی "مەترسیدار" ناوی دەبەن.

 

ڕاگەیێنراوی فەرمی: باسم عەوادی، گوتەبێژی حکومەتی عێراق  بەبێ ئەوەی ناوی ئەمریکا بهێنێت، لە ڕاگەیێنراوێکدا باسی لەوە كرد، بەغدا لە هێرشکردنە سەر دامەزراوە ئەتۆمییەکانی ئێران نیگەرانە و سەرکۆنەی دەکات، باوەڕیشی وایە هێرشەکە ئاشتی لە ڕۆژهەڵاتی ناوەڕاست و ئارامی هەرێمیی دەخاتە مەترسییەکی ڕاستەقینەوە.

 

ئاماژەی بەوەشکردووە، عێراق داوا دەکات ڕێز لە سەروەریی وڵاتان بگیرێت و ئەو دامەزراوانەش نەکرێنە ئامانج کە ئاژانسی نێودەوڵەتیی ئەتۆم سەرپەرشتییان دەکات و بۆ مەبەستی ئاشتی سوودییان لێوەردەگیرێت. جەختیش دەکاتەوە لەوەی بەغدا باوەڕی وایە چارەسەری سەربازی نابێتە جێگرەوەی دانوستان، ئەو هێرشانەش لەوانەیە کاردانەوەی مەترسیداریان هەبێت کە سنووری دەوڵەتان دەبڕێت و کاریگەرییەکەی ئارامی ناوچەکە و جیهانیش دەگرێتەوە.

 

خاڵە ئەرێنییەکان: حکومەتی عێراق داوا لە وڵاتە کاریگەرەکان و دامەزراوە نێودەوڵەتییەکان دەکات جیهان لە قەیرانەکان دووربخەنەوە نەک زیاتری بکەن، بەپێویستیشی دەزانێت دەستبەجێ دۆخەکە هێوربکرێتەوە و کار بۆ کردنەوەی کەناڵی دیپلۆماسی بکرێت، بەجۆرێک ئاسایشی هاوبەش گەرەنتی بکرێت، ڕێز لە یاسا نێودەوڵەتییەکان و پەیماننامەی نەتەوە یەکگرتووەکانیش بگیرێت.